Pelayo

Pa mi que la imaxen más ridícula de tol panorama políticu actual ye la de Santiago Abascal faciendo declaraciones delantre de la estatua de Pelayo en Covadonga. Intentando que, nel imaxinariu colectivu, s'asocien les dos imáxenes: les d'un supuestu rei que ye'l símbolu de la Reconquista y del orixen d'España, y la d'un supuestu líder políticu que quier entamar una nueva reconquista y utilizar aquellos oríxenes míticos.

Sedría una imaxen de risa de nun ser patética. Y, más que nada, de nun entender que detrás d'ello hai xente que sigue creyendo neses tochures. La primer tochura: la de pensar qu'una virxen echara una mano a Pelayo en Covadonga. La segunda: la de que Pelayo fuera rei siquiera y non un inventu de les Cróniques escrites doscientos años más tarde. La tercera: la de qu'esistiera siquiera la batalla de Covadonga, tolo más una engarradiella ente pastores. La cuarta: la de qu'aquello fuera l'aniciu d'una supuesta reconquista, cuando el términu reconquista inventólu Sánchez Albornoz nel XIX. La quinta: la de qu'un cuentu de va mil trescientos años, de la categoría de los cuentos de Merlín y el rei Arturo o de Robin Hood y Ricardo Corazón de León, puea tener dalguna credibilidá a día de güei. La sexta: la de qu'un partíu como Vox se dedique a reivindicar un pasáu falsu, cuentista, santurrión y de chiste.

Lo de la virxen de Covadonga suena a broma. Los propios asturianos va años que-y quitaron la categoría de virxen y dexáronla en santina. Lo de Pelayo nun llega nin siquiera a categoría de rei: namás tuvo'l títulu de Don. Como don Juan Carlos, l'eméritu, el de Bárbara Rey y de Corina, otru bon exemplu pa la nuestra monarquía. Lo de la batalla ye pa llorar poles esquines, falando de diez mil árabes qu'atacaron Covadonga. Ellí nun cabe nin la décima parte y mira qué batalla de risa que nin siquiera se valieron por ellos mesmos que tuvo que baxar del cielu ayuda divina pa echa-yos una mano. Lo de la reconquista ye la más ridícula de les hestories: naide reconquista lo que nun ye d'él. Y, con too ello, lo de Vox sí que ye patético: al delláu de Santiago Abascal va'l diputáu José María Figaredo que s'apellida n'asturianu y que diz que l'asturianu nun existe. Va cambiar Figaredo por Higaredo. Toi viéndolo. En xunto, esta sedría una hestoria de risa si nun hubiera xente que la cree. Y, toa esa xente que lo cree, vota. Y si lleguen mandar colos sos votos, van querer que creamos nosotros toes eses hestoria falses, de cuentu, santurriones y de chiste baratu.