Mierdes del Camín

Acada hora en puntu'l carillón de la Casa Conceyu recuérdanos el cantar de finales del sieglu XIX: «Hermosa villa de Mieres / que guapina vas a ser / con el encauce del ríu / y el parque que van facer». Ye un bon resumen de la hestoria ... d'esta villa. L'encauce del ríu ficiéronlu cien años depués, por mor de l'autovía. De nun ser por ella, pol fechu de que se trataba d'una infraestructura necesaria pa toos, siguiría'l ríu Caudal inundando periódicamente los barrios de Santa Marina, San Pedru y Oñón. El parque nun terminaron de facelu enxamás. El que vemos agora y llamamos Xovellanos ye la décima parte del proyectu orixinal, qu'abarcaba dende l'actual en llinia recta hasta los terrenos qu'ocupen los campos de fútbol y de hockey. Hestories d'un tiempu nel que tamién se cantaba: «Ye Mieres del Camín / xardín de flores». Que yá nun se canta, pero cuando dalguién s'alcuerda, pregúntase: ¿Xardín de flores? ¿De cuándo tamos falando? De xuru que de mui p'atrás. Tan p'atrás que yá nadie s'alcuerda. Dicen que la industria arrasó con muncho. Depués, la minería acabó colo demás. Y, agora que yá nun queda nin industria nin minería, tovía nos queda la gloriosa ruina de les sos construcciones: un llavaderu de carbones espantosu, una cinta tresportadora cruzando'l valle y que nun lleva a nenguna parte, una térmica que fue lo que fue y qu'agora ye lo que ye, una montonera de castilletes testigos de la nada…