El capital

Va quinientos años y picu los reis Isabel y Fernando (que col tiempu tuvieron l'aquel de llamase católicos) otorgaron el títulu de duque de Gandía a Pedro Luís de Borja. ¿Qué lu ameritaba pa tan alta distinción? Dalgo interesante: ser fíu de la querida d'un cardenal. Pero non un cardenal cualquier, sinon del futuru papa Alexandru VI. De la que nació llamábase Rodrigo de Borja. De cardenal n'Italia ya firmaba como Rodrigo Borgia. Nun paga la pena contar nada de la caña italiana de la familia. Too se sabe.

Depués del Pedro Luís heredólo'l fíu, Juan de Borja, y detrás el ñetu, otru Juan de Borja. Pa llegar al cuartu duque, que ye tovía conocíu agora como Francisco de Borja. Meyor como San Francisco de Borja. Coses de familia. Y de ser Grandes d'España, otru títulu más que se-y concedió a la familia. Pa depués de San Francisco siguir como duques Carlos, Francisco Tomás y Carlos Francisco de Borja. Coses de títulos hereditarios. Si siguimos tirando de la cuerda aportamos hasta los nuestros díes. Tovía siguimos teniendo un duque o duquesa de Gandía, anque yá nada tengan que ver con Gandía. Porque nestes hestories, lo de menos siempre ye'l pueblu. El palaciu ye agora una especie de muséu. Conserváronlu los xesuites. San Francisco de Borja yera ún d'ellos.

Al final, lo único que tien importancia nestes hestories ye'l capital. Nun ye que lo dixera Carlos Marx. Ye que vese. Los del pueblu, d'aquella, yeren moros, xudíos y unos pocos cristianos (pero bien armaos). A los moros echáronlos. Los ricos compraron el títulu de cristianu vieyu. A los probes cobráron-yos por poder marchar, vendiéron-yos un pasaxe y, cuando yá taben montaos en barcu, vendiéronlos como esclavos a los berberiscos. Colo xudíos ficieron lo mesmo. Bien de ricos pudieron marcar el títulu de cristianos de tola vida. Los que non, salieron como pudieron del país. A los probes tamién los vendieron a los berberiscos. Y, de too ello, los que cobraron por cristianalos o por vendelos, quedaron amás cola tierra. El que más títulos tenía y más perres, más títulos atropó, más perres fizo y de más tierres s'apropió. A esto llámaselo tovía agora la solución española. El capital siempre gana. Lo de siempre. La hestoria nun se repite. La historia ye siempre la mesma.

Como nun traxe ordenador, escribo esto dende'l móvil. Toi na torre de La Guaida, na desempocadura del ríu Vaca, na playa de L'Auir, a un par de kilómetros de la de Gandía. Por esti ríu subíen les barcaces berberisques. Namás queda de too ello la fiesta de moros y cristianos. Declarada d'interés turísticu. Los xudíos, d'aquella, yeren unos moros más.

• Temas
• Alitar Asturies