Barriu

Vengo viendo nel avión 'In the Heigths'. Yá la viera va un par d'años. N'español titulárase 'En un barrio de Nueva York'. Orixinalmente fuera un musical de Broadway. El vuelu fuera lo bastante llargu pa vela un par de vueltes. Ye de les míes. Como 'Cantando bajo la lluvia'. Como 'Sevillanas', de Carlos Saura. Como 'Flashdance'. Y si tiro p'atrás, como 'Ritmo loco', de Fred Astaire y Ginger Rogers. Pero, lo que más me presta de 'In the Heigths' nun son les canciones y los númberos musicales, ye la defensa del barriu, de lo que'l barriu tien como seña d'identidá.

Toi acabante d'aportar a Mieres. Dando la vueltina col perru avero al barriu de les escuelines de críu, Santa Marina, al barriu nel que vivía la mio madrina, Oñón, al barriu que trevesaba camín del institutu, La Villa, y al barriu al que diba buscar a mio suegru pa xintar los domingos, Requexu. La vuelta completa nun me lleva nin una hora. Cuento lo que cuento siempre: ¿nun habrá manera de poner a la entrada de cada barriu la foto del conceyal d'urbanismu y la del alcalde de la época que permitieron y aprobaron esta estrocina? Si, ho, un cartelín d'esos, tipu turísticu, que faiga recordar a los sos vecinos qu'aquello fuera un barriu enllenu de vida enantes de que la ignorancia de lo que yera la modernidá acabara con ellos. A mi tocóme trabayar nesos años nel ayuntamientu y, más o menos, acuérdome de como fue diendo too, pasu ente pasu. Oñón yá nun esiste. De La Villa yá nun va quedando nada. Nos solares derribaos tan faciendo aparcamientos. Y espacios vacios. Como un homenaxe a la nada. Nesti últimu derribu de La Villa ye un bon exemplu pa poner un cartelu que diga: «Esti homenaxe a la nada fízose con tal conceyal d'urbanismu y gobernando tal alcalde».

Al barriu de Santa Marina quitáron-y va años la más grande seña d'identidá, la canal. La mesma canal qu'agora ye l'exe identitariu de llugares como Baden-Baden o tantos otros per Europa entero. Al barriu de Requexu quéda-y nada. Nun hai más que dar una vueltina pa decatase d'ello. Bueno, sí, quéda-y La Belonga, el cementeriu. Y asina sucesivamente. Ensín identidá nenguna, Mieres nun dexa de perder habitantes. La capital, unos venti mil. El conceyu, poco más de trenta. Tan pensando censar a los perros como vecinos. Por aquello del dichu: «¿Yes de Mieres? ¿Tienes perru?». Va ser la única manera de llegar otra vez a los cincuenta mil.

• Temas
• Alitar Asturies