Barrileros

Va poco dicíase: «Hasta'l cuarenta de mayu nun te quites el sayu». Agora dizse: «Hasta que nun se tire un inglés d'un balcón d'un hotel en Magaluf nun saques del armariu'l bañador». Asina de cruel ye la realidá. Vengo de pasar unos díes nun hotel atacáu d'ingleses na Costa del Sol. Bueno, del sol que facía a cachos porque a la tarde tocaba cásique siempre tormenta. Con too, vuelvo negru. Como siempre, negru pol sol por más qu'eche protección 50 plus. Pero también negru por estos prototipos d'alcohólicos suicides de balcón en balcón que te dexen dormir cuando ellos duermen la mona. Esi ye'l términu, porque amás d'ingleses son monos monísimos. Cuando guaje -que yá anduviera per estes tierres-, los únicos monos yeren los de Gibraltar. Agora, con esto de l'apertura de fronteres, los monos blincaron del Peñón a Estepona, a San Pedro de Alcántara, a Marbella, a la Cala de Mijas, a Fuengirola, a Benalmádena, a Torremolinos y yá se los ve, a cachos, paseando por Málaga. Cuando non garren l'avión y blinquen directos a Magaluf o al Racó de l'Oix de Benidorm (qu'ellos ya llamen dafecho The Lois Corner).

La verdá seya dicha, munches perres tienen que dexar estes bandes organizaes de hooligans o d'amigos de despidida de solteru/soltera. Munches perres, insisto, porque sinon nun s'entiende que se-yos dexe montar les que monten. O mui barato-yos tien que salir pa venir en desbandada como vienen. Porque, también ye cierto, esisten otros ingleses, anónimos, tranquilos, disfrutando y dexando disfrutar. Y, evidentemente, vistíos d'ingleses. Ensin más. Como los franceses de franceses. Como los malagueños de malagueños. Convirtiéndose en parte del llugar y comiendo más, bebiendo más caro y comprando bien. En fin, gastando más perres que los miembros vocingleros de l'asociación de camisetes de fútbol berrando peles esquines.

Y, con too y ellos, que maravía de llugares. Qué maravía de lluz y de mar. Bueno, y qué maravía de palo cortado, de chicharrones, de cerveza xelao, d'atún d'almadraba, de buleríes y de sonrises. Dende'l primer momentu t'escaeces de los ingleses barrileros (que son más, pero bien poco diferentes a los españoles bullangueros, los alemanes folloneros, los rusos zapatiestos, los marroquíes griescosos o los albaneses camorreros). Porque esta lluz acaba matando toa esa oscuridá que traen a recostinos. Porque esti mar acaba llavando tanta cochambre. Porque igual Málaga nun ye'l llugar más guapu del mundu porque existe Cádiz. Pero sigue al pie de la lletra la regla más grande del márketing de productu: si nun pues ser el primeru, al menos esfuérzate por ser el segundu. Y consíguelo.