Insultos

De pequeños, nel institutu, teníamos un profesor que nun llamaba a naide pol so nome. A mi llamábame Cabezón, enxamás Ismael; Jorge yera Tanque, porque tenía l'apariencia d'un tanque; José Luís yera Patatiesa, pola poliomelitis; Alberto yera Miracielos, porque nun s'atrevía a miralu a la cara; Aurorina yera Micomandante, porque yera fía d'un guardia civil; el Gochu yera'l Gochu, porque yera fíu de la Gocha; y Atilano yera Atilano, porque dicía que bastante tenía pa con él por llamase Atilano. Asina yera la enseñanza y asina bien d'ellos de los nuestros profesores. Agora, resulta difícil d'entender. Nacimos ente insultos, criámonos ente insultos y quixeron facenos creer que l'insultu yera dalgo normal. Nosotros tamién reconocíamos asina a los nuestros profesores. A esti profesor llamábemoslu el Fartures, polo que comía, lo que bebía y lo que dormía depués de comer y beber y ponese a dar clase; la de matemátiques yera la Vieya, pola edá seguramente; el de ximnasia Pitina, porque tol día taba tocando'l xiblatu; el de llatín, Don Perfeuto, porque nos reñia por falar mal castellanu y namás que bebía un poco empapiellaba y dicía Perfeutu en vez de Perfecto; el de química Steve McQueen, porque hasta él mesmu lo creyía; y, ente tantos otros, a doña Rogelia, la de xeografía, llamábamosla doña Rogelia, porque bastante tenía pa con ella llamándose asina. Vivimos ente insultos, ficímosnos a ellos y siguimos practicándolos de mayores como parte de la herencia de la nuestra educación.

Agora mesmo que soi vieyu y debí de dexar de ser cabezón, llámenme Vieyu o Paisanu o coses asemeyaes, y siguimos entendiéndolo como dalgo normal. Miramos la tele o sentimos la radio y nun escuchamos más qu'insultos. Hai programes que nun tan especializaos más que n'insultos y voces. A más insultos y más voces, meyor programa, mayor audiencia. A esta tierra enseñada a base d'insultos llámenla España. Por eso cuando llames español a dalgún de los sos habitantes siéntelo como un insultu. Ye normal: yá nun sabemos lo que ye insultu y lo que nun lo ye. Perdimos la identidá de nosotros mesmos cuando nos quitaron el nome. Perdimos toles identidaes. Los gallegos son parvos; los vascos, txoriburus; los baleares, mitja merdas; los navarros, escuchapedos; los murcianos, tonto'l pijo; los riojanos, bobochorras; los aragoneses, matutanos; los catalanes, fabas; los madrileños, fanés; los andaluces, malajes; los valencianos, panfigols; los extremeños, farraguas; los manchegos, risiones; los castellanos, lechuguinos; los canarios, bobomierdas; y los asturianos, babayos. Y la cosa sigue igual pela Comunidá Europea alantre. Los italianos, son merdas; los franceses, connards (gilipollas); los austriacos, beidls (pirulinos); los daneses, skidespraeller (torcemierdes); los griegos, malakas (garrulos); los alemanes, hurensohn (fíos d'alemana llixera)… y asina hasta'l cansanciu.