Una hestoria de conceyu contada en primer persona

Moderaos pola responsable de la Oficina de Normalización Llingüística de Xixón, Mª Xosé Rodríguez, los hestóricos 'conceyeros' tuvieron una alcordanza pa los sos collacios que ya nun tán y remembraron en tonu afayadizu dellos de los episodios más significativos de la historia del colectivu o el contestu nel que surdió, metanes una dictadura que daba les útimes boquiaes y una «democracia vixilada» na que C.B. tuvo movese nos sos anicios «ente la llegalidá y una semiclandestinidá». Emponderaron el papel de la revista Asturias Semanal, «tan necesaria entós como lo sería güei», apuntó González y «dalgo mui innovador qu'abría una puerta a la esperanza» pa Trancho. Ella y García Oliva entraron en Conceyu nun cursu pioneru «sobre bable» que llogró xuntar en Xixón a 122 matriculaos.

Otres cifres puestes na mesa valieron pa dar un rellumu del ésitu que diba algamar el movimientu como les 35.000 firmes recoyíes en 1976 na campaña pol 'Bable nes escueles' o les 6.000 persones, según el datu ufríu entós por EL COMERCIO, que participaron el mesmu añu na primer manifestación permitida na villa del precursor asturianista Xovellanos. El nuestru diariu tamién meritó la mención de Vicente García Oliva al evocar l'espaciu que'l añoráu Francisco Carantoña-yos brindó y que diba llevar el nome de 'Estaya rexonal', l'antecedente inmediatu de 'Alitar Asturies'. Ente'l públicu, abondos 'conceyeros' igual d'hestóricos como l'ex llibreru Xicu Yepes, el filólogu Ramón d'Andrés, l'escritor Monchu Díaz o l'economista David Rivas. Testigos toos y protagonistes del mediu sieglu crucia d'historia d'Asturies que se reconoz nestes Lletres.