¿Por qué nun ganen premios les muyeres?

Un añu más el fallu de los premios lliterarios de la Conseyería de Cultura constata l'ausencia d'autores femenines nellos, cola única escepción de Vego Suari, coautora del llibru ganador nel María Xosefa Canellada. Plantegamos l'asuntu a cuatro escritores de distintes xeneraciones. Laura Marcos, que tien nel so haber el Premiu Fernán Coronas de poesía y dellos de narrativa cuida que «ye dalgo que va de la mano de qu'hai menos muyeres escritores. A ello xúntase-y una menor autoconfianza pa presentase a premios o la dificultá pa conciliar. Tamién sigue habiendo xuraos mayoritariamente masculinos. Hai un esfuerzu por igualo y creo que nun va tardar en qu' haya igual númberu d'escritores muyeres. Pero pa qu'haya paridá han dase una serie cambios estructurales que van tardar».

Otra ganadora en certámenes de cuentos, Blanca Fernández, considera que «nel casu de la novela nun creo que sea namás qu'haya poques autores, hailes pero tienen les obres nun caxón y o nun se presenten a premios o nun gusten a los xuraos». Lláma-y l'atención «que la nuestra primer novelista seya una muyer y parezme imposible qu'habiendo muyeres escribiendo relatos de calidá nun haya noveles nos premios». Gallardones como'l Nobel o los últimos Princesa son señes positives pa ella: «Equí vamos atrasaos pero toi convencida que va llograse».

Esther García, presidenta de l'Asociación d'Escritores d'Asturies, cuenta que «la falta de conciliación pesa y un ciertu mieu pa dar el pasu de presentase, porque nun nos valoramos como debíamos. La cultura del patriarcáu ta ende y mesmo en xuraos paritarios les muyeres paez que somos más desixentes con nós mesmes. Culturalmente tenemos dientro dalgo que frena esi empuxón».

La escritora y editora Esther Prieto coincide en que «les muyeres tamos tan avezaes a tar en segundu planu que tenemos un seriu problema a la hora dar un pasu alantre y al empar, por muncho que nos cuenten, nun llegamos a una igualdá real. Los xuraos paritarios son un primer pasu, pero la sociedá nun lo ye». Premios como'l Nobel a Louis Gluck cree que «son la escepción que confirma la regla» y l'aumentu de muyeres nes xeneraciones moces «un guiñu al optimismu, pero nun hai cásique novelistes y eso marcaría un pasu a la normalidá. Preocúpame por qué nun lu tamos dando».

Marta Mori, foi la primer muyer n'algamar el Xuan María Acebal y afita la mesma rocea que Prieto: «La lliteratura ye un reflexu de la sociedá y la desigualdá ta instalada nella. Un datu: la nuestra fienda salarial ye la más alta del estáu y la corresponsabilidá ta n'indices mui baxos. Nun me choca que la lliteratura espeye eso». Hai otra realidá: «La lliteratura feminista gusta a les muyeres, lleemos lo qu'ellos escriben y gústanos; los homes sicasí nun suelen lleer lo qu'escriben les muyeres y si ye feminista nun-yos gusta. Eso inflúi nos premios na hora escoyer obres d'asemeyada calidá», opina. «Apréciase'l feminismu políticamente, pero lliterariamente ye otru cantar».

• Temas
• Alitar Asturies
• La actualidá n'asturianu