Xulio Vixil

«Fuera'l posu personal, escapé d'una novela llagrimosa»

Xulio Vixil (San Xulián, Bimenes, 1964) acaba publicar la novela 'Miel amargo' (Impronta), cola qu'algamó la edición 44 del Premiu Xosefa Xovellanos y el so primer llibru desque asoleyare en 2005 'L'inmoral'. El autor yerbatu, un nome clave de la Segunda Xeneración del Surdimientu, fala d'esta obra nueva p'Alitar y de les sos esmoliciones lliteraries nesti tiempu.

–¿Por qué-y abagó tanto volver escribir?

–Fueron cuestiones personales. A Juan Rulfo cuando-y preguntaben por qué nun volvió escribir después de los dos llibros que-y dieron fama, dicía que morriera un tíu suyu que yera'l que-y contaba histories. A mí pasóme que morrió la persona que lleía les mios histories. Esta novela salió por una idea fantástica, como ye ella mesma, de qu'a lo meyor hai dalguna conexón interplanetaria y aquella persona igual la podía lleer y seguramente-y prestaba.

–¿Qué otres razones lu afalaron?

–Ye una novela que nació tamién por una necesidá personal, non de publicación, de fechu nun pensaba nello. Tardé venti años n'enfrentame a los mios propios pantasmes y lo primero que tenté ye que fuere entretenida. Trataba coses mui personales, que'l gran públicu espero que nun lo vea, y lo que quería yera, dende munchísimu tiempu escribir una novela de lo que más me gusta a mi que ye eso que llamen ciencia ficción. Nesti casu sería ciencia ficción 'blanda', nel sentíu que lo científico nun ye lo que tien preminencia, sinón lo que se trata ye de relatar una historia y ponela nun ámbitu de ciencia ficción. Ye un xéneru que permite con munchos escenarios distintos falar de cualquier cosa: dende amores desgarrapaos o perdíos, temes medioambientales, políticos, de too. Y yo tenía muncha gana de poneme con esi xéneru que pa mi ye primordial, anque dificilísimu. Como'l negru tien de caltener un tipu de coherencia, sinón queda en dalgo ridículo.

–¿Cómo llogró llibrar esa dificultá, con qué recursos?

–Dempués de toos esos años ensin escribir, pero productivos, de lleer muncho, atrevime y salió una novela hasta ciertu puntu costumista, porque fala de coses del día a día, sentimientos que puede tener cualquiera, pero dando-y esi toque de ciencia ficción, metese nel terrén de lo posible, ye dicir lo posible con una base científica. Lo primero que fixe fue poner esi marcu. Después contar una historia que fala de pérdides, con una corriente sentimental que lo trescala too, una historia personal que solo saben los que me conocen y aparte d'esi tresfondu emocional, hai tamién una aventura. Pa los que nacimos y crecimos con Wells y Verne l'aventura ye imprescindible, ye la salsa de la vida. Una novela que tenga aventura, seya entretenida y amás cuente coses que yo quiero contar por necesidá d'echales fuera. Asina foi como fixe 'Miel Amargo'.

–Ye una historia bien distinta de 'L'inmoral', sicasí parez tener en común el propósitu de contar un asuntu d'algame xeneral, trescendiendo referencies llocales. ¿Ta d'alcuerdu?

–Nesa novela de va 20 años, onde se viaxa muncho y Asturies tien un pesu relativamente pequeñu, tenía clara la idea de escribir lliteratura con gana de contar coses que puedan interesar a cualquiera de cualquier país. Creo que neso influin les llectures, yes lo que llees, aparte de lo que vives. 'Miel amargo' sucede n'Asturies, hai un momentu que se cita Uviéu, por exemplu, pero si en vez d'Uvièu pongo Sebastopol da lo mesmo. Lo que sí ye verdá ye que, al pesar d'esi posu personal escapé de que fuere una novella llagrimosa y si hai un tresfondu asturianu vese pol tipu d'humor que nos caracteriza. Porque yo creo que son dos coses les que nos faen ser un país: l'idioma y una manera de ver les coses humorísticamente.

–Como autor d'esta obra de xéneru, ¿siéntese a la par de los escritores mozos qu'apuesten polo fantástico?

–Hai editoriales que tán publicando a esa xente mozo nesa llinia fantástica y préstame muncho. La lliteratura asturiana a lo que tien d'aspirar ye qu'a cualquier-y pueda prestar una obra, independientemente de la llingua. Y qu'esistan obres d'evasión parezme fenomenal.

• Temas
• Alitar Asturies