«Nun fai falta una marca en inglés pa molar, tamién se puede n'asturianu»

La so creadora desplica los oríxenes de la iniciativa: «Fai un añu vivía en Madrid, tenía el mio trabayu y aparte d'eso apetecíame crear un proyectu que vinculase la identidá asturiana y el feminismu dende una visión actual, moderna, un poco más fresca de lo que se taba faciendo hasta agora. Eso yera una especie de hobby que tenía y empecé a facer camisetes vinculao a lo que ye'l remangu pa les muyeres asturianes. Volví p'Asturies y pillónos la pandemia, como tábamos en casa y tenía más vagar, decidí dedicá-y un poco más de tiempu y cariñu al proyectu», relata.

Al empar que salíen los primeros diseños de ropa, complementos y 'caxigalines' (postales, taces, bolsines d'hixene personal), escomenzaron a xubir ca día nes redes sociales hestories de güeles escrites poles sos nietes. «Tuvo mui bona acoyida y dábanos pena que quedare namás nun formatu dixital. Encaxaba pa facer dalgo más calentino y emotivo, como un llibru autoeditáu. Amás de les 30 histories que publicamos xuntamos otres 5 que nun llegamos xubir. El pilar fundamental de toles hestories ye'l remangu, dalgo que s'identifica bien con una güela asturiana», espón Areces.

La filosofía del proyectu: «Da-y la vuelta a les coses, a munchos conceptos que nun tienen que morrer, sinón evolucionar y adaptase al día a día. Ye una manera de reivindicar que nun fai falta tener una marca n'inglés pa 'molar', tamién se puede n'asturianu, coles nuestres palabres y la nuestra identidá. Intentamos tamién que too tenga un por qué y cada cosa un conceptu detrás, un pesu y una razón, que nun sea sacar camisetes al tuntún», apunta.

Como creativa profesional interpreta la mesma positividá nel usu de la nuestra llingua nes campañes de marques multinacionales: «amuesa que la xente identifícase col asturianu, tamos nuna fase na que ya nun se ve como dalgo negativo o que t'eche p'atrás, sinón lo contrario: una identidá que namás tenemos nós y de la qu'hai de sentir arguyu. La pena ye que tengan facelo marques de fuera.

Creo que les d'equí habíen ponese les piles pa usar l'asturianu de manera natural«. De la mesma miente percibe que'l movimientu reivindicativu de la llingua non siempre acierta al comunicase cola sociedá: »la intención ye bona, pero'l mensaxe nun puede ser pa los que ya tan convencíos, hai que llegar a la xente que nin siquier se planteó si ta a favor o escontra l'asturianu y facelo d'una manera positiva, amable, integradora. Mensaxes que sean compartibles y amigables. Hai que 'molar'. Esa ye la clave«, encamienta.