Docente, secretaria d'Educación y Política Llingüística na FSA y escritora, Mari Luz Pontón estrénase na narrativa xuvenil cola novela 'La moza d'ayeri' (Trabe), una historia sobre'l pasáu más recién del franquismu y la transición protagonizada por muyeres.
– A veces hai que salir de la zona de confort y yo quería camudar. Trabayo con adultos y al ver el desconocimientu que tienen los mios estudiantes sobre la dictadura franquista, afalóme a escribir esta historia. Toos fuimos mocines o mozos y daquella nos 80, en mio casa polo menos, como en munches, cuando queríes falar de Franco dicíente que tú nun vivieras eso y nun teníes por qué sabelo, yera un silenciu bien profundu'l qu'había sobre'l tema. Quiciabes porque se pasó mui mal y probablemente pa nun crear conflitu yera meyor callalo, pasar páxina. Eso conllevó a que lo aceptáramos. Tampoco nel institutu te comentaben muncho, teníes que buscar tú la información per to cuenta. Y esi tupidu velu que se punxo enriba la verdá fizo qu'agora haya un revisionismu terrible y con ello una gran desinformación. Esta ye una historia que me prestaba contar y d'ehí salió.
– ¿Cómo la definiría?
– Ye la saga de tres muyeres d'una familia que marcha pa Francia en plenu franquismu y el so regresu posterior. Nun ye la realidá, nin una novela histórica, pero sí hai momentos vivíos y un llibru que tien pasaxes nos qu'incluso te puedes divertir, pero hai una crítica grande a aquella sociedá tan cerrada y difícil, sobre too si yeres muyer. Ta la visión d'eses muyeres de querer salir d'esa España negra que nun les dexaba medrar nin ser como yeren. Ehí ta la mocina protagonista, Colette que tien 18 años cuando'l golpe fallíu del 23F. Ye una muyer valiente, como la güela y descubre la verdá na so vida, porque hasta entós yera una mentira.
– ¿El so propósitu ye tamién que los llectores mozos nun vivan dalgo asemeyao?
– Al llau d'esi desconocimientu del que falaba, creo qu'hai xente mozo a los que-yos interesa saber lo que pasó nesi tiempu. La memoria, ye necesaria, aquello puede repetise y vemos lo que ta pasando n'Europa, nel mundu. Fai falta volver a recordar pa entender que lo qu'hai agora ye resultáu d'una transición na que yera dificil facelo bien y que s'intentó, pero quedaron cabos mui sueltos, nun s'esplicó y tenemos lo que tenemos. Pa entender el presente y el futuru nun queda otra que saber qué sucedió nel pasáu. Y nunca ye tarde.
– Énte una historia de muyeres como esta, ¿por qué sigue habiendo tan poca presencia d'elles como autores de novela?
– Nesta mesma collección nun había nenguna. Nun sé si hai mayor rocea o mieu a enfrentase a una novela pola educación que recibimos y que lleva a eso, a que los homes piensen que son meyores de lo que son y les muyeres a lo contrario. Supongo que ye un conxuntu de factores, la vida pa les muyeres en xeneral sigue siendo más dura, con más cargues y escribir una novela lleva munchu esfuerzu. Y ye increyible porque hai una retafila d'autores qu'escriben en tolos xéneros con munchísima calidá. Dende llueu ye dalgo que tien que cambiar. Nel futuru quiero ser optimista y de xuro que vamos ver munches noveles de muyeres, como nun podía ser d'otra manera.
– ¿Ye igual d'optimista énte la oficialidá al pesar del non del principal partíu de la oposición?
– La oficialidá nel PSOE naide creía que se diba algamar cuando surdió nun congresu va siete años, yo fui una de les persones que preparó una enmienda y xuntamos a munchos militantes, xuniéronse más de 27 agrupaciones y al final hubo una mayoría que lo sofitó. Al señor Queipo, diría-y que tamién él dexe que falen los militantes como fiximos nós. Nun sé por qué esi mieu, la oficialida nun obliga a naide a falar, obliga a la administración pa que la xente que s'espresa n'asturiano tenga loportunidá de facelo. Que mire a Galicia, ellí Feijoo fala d'un billingüismu cordial ¿por que nun va selo equí?
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.