«Escoyí melodíes difíciles pero bien guapes»

Xaime Arias (Mieres del Camín, 1966), ún de los solistes más versátiles y acreditaos de la nuestra escena, tanto na so llarga trayectoria nel mundu del jazz como nel de l'anovación ya igua de los sones y cantares del país, ta acabante publicar 'Diez canciones asturianes pa gaita y pianu' (Trabe), una esbilla de melodíes populares coles sos partitures empobinada a los mesmos instrumentistes y sobremanera a los que tán formándose nes estremaes escueles de música tradicional o conservatorios. Él mesmu, docente del Superior Profesional 'Eduardo Martínez Torner' d'Uviéu y coautor -xunta'l so hermanu Ismael María González Arias- del ensayu 'L'Asturianada' (SPPA, 1998), caltién qu'ente les delles razones que lu llevaron a preparar esti cancioneru ta la so esperiencia acompañando a cantadores de tonada y gaiteros col so pianu, pero sobremanera, apunta: «Apetecióme sacar esti repertoriu porque me parez necesariu nun ámbitu qu'al pesar de tar regláu, adolez d'él».

En cuantes a la escoyeta de les pieces, Arias desplica que «de los diez qu'aparecen ocho provienen de la tonada. Dellos son más conocíos qu'otros y tamién unos más fáciles o complicaos de tocar. Tán 'A la mar vanse los ríos', 'Aulla un perru, madre', que nun ye asturianada, sinón un romance que se recueye equí y siempre me prestó muncho. Xunta ellos, 'Baxaron cuatro alleranos', 'En tola quintana', 'La mina y el mar', 'La mio neña', 'Si quies que te cortexe', 'Ya sabes que tengo gatu' y un tema instrumental, que ye una marcha procesional de Teberga». Tolos diez formen parte, señala «d'un repertoriu que xeneralmente los gaiteros nun trabayen, faen xotes, fandangos, otru tipu de melodíes. Prestábame meter estes porque amás de ser precioses, como la mayoría pertenecen al xéneru de la tonada, tiénenles un poco escaecíes. Son bien guapes y a ver si pueden encandilar a dalguién». Polo que toca a los arreglos, revela que «les que nun son asturianaes toméme una llibertá más grande y fíce-yos dalgún ritmu irregular, una serie de cambios. Hai dalgunes con una dificultá que nun pensaba y al enfrentase con elles igual más d'un gaiteru s'estrella, el probe, pero nada que nun se pueda facer», matiza ente rises.

Inda'l propósitu orixinal empobínase a los intérpretes de gaita, Arias aclaria que «eso nun significa que nun pueda vivir n'otru intrumentu. Les armonizaciones tán escrites al pianu pero tamién presento n'anexos la partitura con cifrao americano pa qu' otra xente que toque la guitarra, pongo por casu o una banda si quieren, puedan facelo valiéndose d'ello». Avezáu a los sos acompañamientos de cantadores col tecláu nos que suel amosar guiños al jazz, el músicu reconoz que nes pieces recoyíes «no que cinca a l'armonía sí hai una cierta relación ente esi vocabulariu y los arreglos que tienen. Nun ye que fuere un empeñu, sinón que la manera de facer d'ún al final refléxase tamién. De toles maneres el planteamientu ye mui otru al del discu que saqué col Xaime Arias Trío: 'La mio neña', con cantares tradicionales y onde sí hai una clara factura jazzística. Sicasí, el fechu d'inxerir el cifrao americano val pa que lo pueda usar el que quiera facelo nesi palu o mesmo del folk».

Alrodiu la escasez de repertoriu pa gaita, Arias opina que «gracies a Dios cada vez hai más, pero dacuando tírase de repertoriu gallegu. En Galicia la gaita lleva más tiempu incorporada a los conservatorios y dende la Xunta sí hubo un apueste por incentivar la creación de repertoriu, dalgo que por desgracia nun pasa equí«. Col enfotu d'iguar, na midida lo posible, esa situación, el pianista xunta otros músicos y docentes, como los gaiteros Pedro Pangua y Flavio de Benito formaran el grupu de trabayu 'Axuntábense'. D'esi procuru, espresa l'autor del cancioneru que tamién surdió esti llibru. Tres presentalu con un recital mano a mano col gaiteru Pablo Casado, entrambos contemplen la posibilidá de recoyer esi llabor nun discu y nuna serie de conciertos «que valieren tamién pa divulgar estes melodíes», avanza'l pianista.