Cuarenta y cinco primaveres alendando la nuestra llingua

Esti sábadu 8 d'abril 'Alitar Asturies' cumple cuarenta y cinco años dando presencia a la nuestra llingua nes páxines de EL COMERCIO. Tien llovío abondo dende aquella primavera de 1978 na qu'un grupu de rapazos, militantes de Conceyu Bable de Xixón, foi visitar al entós director del periódicu, Francisco Carantoña, pa proponé-y la publicación d'un espaciu n'asturianu. El propiu idioma tien vivío de magar un percorríu que naide entós, metanes la incierta y convulsa Transición política española, podía imaxinar. Y nes sos propies palabres se foi contando la historia d'esi camín al futuru nes planes del nuestru diariu selmana a selmana hasta güei. Siguimos faciéndolo, nesta ocasión, pa remembrar el llabor de tolos que contribuyeron a qu'alitase la sección decana en llingua asturiana de la prensa'l país.

El profesor y académicu de la Llingua Ramón d'Andrés conserva como oro en pañu la colección completa en papel de 'Alitar'. Yera ún d'aquellos mozos que se reunieron col añoráu director de EL COMERCIO y de lo único que nun s'alcuerda con esactitú ye si naquel abril -fiel al refrán y al versu de T. S. Eliot- llovía o si la ventolera escamplaba'l cielu p'asoleyar los praos floríos. Remembra, eso sí, con tola claridá y estima aquel alcuentru nel vieyu edificiu del periódicu. «L'acoyida de Carantoña foi mui bona. Nun hubo prácticamente discusión nin punxo inconveniente ningún. Violo mui bien y asina escomenzamos. Yera una persona mui tolerante, un auténticu lliberal. Nunca interfirió en nada nin hubo enxamás ningún problema con él. Tuvimos siempre una llibertá absoluta no que se publicaba», evoca agora.

La nueva sección oldeábase n'enfotu y conteníos a la que dio empiezu al movimientu pola recuperación del asturianu na revista 'Asturias Semanal' dirixía por Graciano García, y cuntaba con un antecedente nel nuestru diariu, les columnes nomaes 'Estaya rexonal', que vio la lluz el 20 de payares de 1976 -cuando se cumplía el primer cabudañu de la muerte del dictador- y tuvo una continuidá desigual hasta la so desaparición. Recuperar un espaciu asemeyáu yera'l propósitu de los activistes xixoneses de Conceyu Bable qu'entamaron 'Alitar Asturies'. D'Andrés apunta que'l nome foi idea del futuru mayestru d'asturianu y escritor Nel Ricardo Álvarez Morán, 'Nelu'. Xunto a ellos, otros nomes que diben algamar protagonismu nes nuestres lletres col tiempu, como Andrés Solar, Carlos Rubiera, Vicente García Oliva, Monchu Díaz, María Teresa González o Mánfer de la Llera, xunto a otros como l'abogáu Constante Álvarez o l'ex presidente de Cruz Roja Xixón, Xosé Lluis Carmona. Dende aquellos primeros númberos hasta anguaño na nómina de collaboradores va tar la práctica totalidá de los autores na nuestra llingua y de toles xeneraciones.

Naquel primer 'Alitar' del 8 d'abril de 1978 ufiertábase una plana de conteníos que diben marcar l'aldu de la so dómina inicial. Abríase con una presentación na qu'a manera de declaración de principios anunciábase que «la fueya tá dedicá a Asturies y, en consecuencia, vá tar escribía en bable, na nuestra melguera llingua. Conceyu Bable considera que ye pernecesario, güei, un puxu p'alitar la nuestra llingua, la nuestra fala que tá cuánta ya (sic) escaecía, humillá y tapecía».

Y, tres facer un repasu a dellos de los problemes qu'afectaben el so desenvolvimientu, como la diglosia o la torga al so usu na escuela, remataba con un llamáu a facer efectiva la cabecera de la páxina: «Asturianos, ye hora ya de puxar pola nuestra tierra, ye hora de tomar conciencia de la nuestra identidá y asumir, en sin vergoña, los nuestros vezos». Xunta esi saludu, dábase un artículu sobre los asturcones -«¿Quiciaves (sic) los últimos astures?»-, una gramática de la llingua n'entregues -'El bable ye fácil', de Ramón d'Andrés- y una sección de flashes breves d'actualidá titulada 'Notines' na que se daba cuenta, ente otros asuntos, d'un Seminariu de Llingua Asturiana na Facultá de Filosofía y Lletres que tenía como ponentes a los doctores Emilio Alarcos, Jesús Neira, Josefina Martínez y Alonso Zamora Vicente.

A lo llargo de les sos cuatro décades y media d'esistencia, el calter de los artículos daos a estampa en 'Alitar' va ser tan variáu como'l propiu contestu del tiempu que los afala y el criteriu de les diverses persones que llevaben la sección. El profesor d'Andrés, que la empobinó hasta 1981 -na que coyó'l relevu so padre, l'escritor Mánfer de la Llera- y, dende 1991 a 2002, tuvo la curiosidá d'esbillar delles de les informaciones que salieron recoyíes ende y el resultáu ye una suerte d'historia breve de la cultura d'Asturies contemporánea: de la publicación del segundu llibru de Manuel Asur a la muerte del historiador Juan Uría Ríu, la creación de l'Academia la Llingua, una entrevista d'Andrés Solar al Tarangu, la primer tesis n'asturianu, l'aconceyamientu de la Xunta pola Defensa de la Llingua col entós Príncipe d'Asturies o la declaración d'oficialidá de Bimenes. La mesma sección diba ser noticia cuando en 1991 la Xunta-y concede a EL COMERCIO el so Pegollu nos Premios Andrés Solar por caltener 'Alitar Asturies' o cuando, dos años más tarde y pol mesmu motivu, esti diariu recibe ún de los gallardones de los profesores y alumnos del Institutu Mata Jove.

Xunta Ramón d'Andrés, so padre Mánfer de la Llera diba ser un puntal fundamental nel curiáu de 'Alitar'. Nun artículu conmemorativu del trenta aniversariu de la sección, el so fíu remembrábalu escribiendo les sos collaboraciones a mano «con lletra impecable d'escuela de los años 20» enantes de teclealos nuna vieya Underwood col pitu a mano. De la que'l gran poeta de la mina y patriarca de les nuestres lletres cumplió 80 llúcidos años tamién se daría cuenta bona nestes páxines. El filólogu resume como balance d'estos 45 años: «Plasma que dure hasta güei ensin nenguna interrupción. Ye un verdaderu exemplu de constancia». Después d'él, diben ser Xurde Fernández, Paco Álvarez y Enrique Carballeira los responsables d'enllenala de conteníos cada selmana. Siguimos a facelo arguyosos d'alitar la llingua asturiana a los nuestros llectores.

• Temas
• Asturianos
• Alitar Asturies