Conceyu Bable, el movimientu que cambió pa siempre la historia de la llingua asturiana

Resumir el llargu camín andáu por aquella asociación cívico-cultural ye xera más d'estudiosos académicos que d'estes páxines nacíes a la par y de la mano asturianista de Conceyu, pero sí hai sitiu afayadizu pa tentar l'alcordanza de dellos fitos que marcaron esi movimientu y dende él a la mesma comunidá asturiana. El más resaltable ye que güei teamos falando y escribiendo nun idioma al que la sociedá d'entós percibía como una reliquia del pasáu, ensin nengún interés fuera del emocional. Qu'anguaño se faiga n'asturianu investigación científica d'escelencia, lliteratura, cine o música de calidá y algame universales o que s'enseñe nes escueles –una de les primeres reivindicaciónes de Conceyu Bable–, son realidaes que-y debemos al trabayu inxente d'esi movimientu. Hai munchos otros, que de xuro una estaya importante de los asturianos desconoz y que formen de cuantayá parte del imaxinariu colectivu o de la simboloxía institucional. Empezando pola bandera oficial d'Asturies, recuperada de los estandartes que se llevantaron n'Uviéu contra la invasión francesa en mayu de 1808. La primera, tien contao la que fuera presidenta de Conceyu Bable nos sos últimos años, Amelia Varcárcel, que la bordó ella mesma, como una nueva Mariana Pineda. La filósofa y ex conseyera de Cultura, ye a toles lluces, la cuarta fundadora de l'asociación asturianista, una figura ausente nes dos semeyes históriques de 1974 y 2024, pero que sí aparez n'otres cellebraciones anteriores. La propia Varcárcel tiense atribuío de la mesmamiente, l'autoría de la conseña más repetía de magar en momentos d'efusión asturianista o folixera, el mesmésimu «¡Puxa Asturies!».

Si volvemos a la famosa fotografía en blanco y negro de los 'padres' de Conceyu, podíamos remembrar tamién l'antes más inmediatu a esi intre históricu. Nada surde de la nada y aquellos tres universitarios aparecen ellí coles sos revolucionaries propuestes acabantes romper colo que representaba una xeneración anterior venceyada al franquismu y que tenía de la llingua asturiana una visión netamente sentimental, cuando non folklórica o dafechu diglósica. El surdimientu de Conceyu Bable foi dalgo más qu'una reacción a los 'bablistes vieyos', significaba un auténticu borrón y cuenta nueva, una radical puesta en práctica d'aquellos versos del poeta Manuel Asur que convidaben a volver a entamar los llabores de la casa. El después de la semeya de 'Asturias Semanal' fue la nacencia de Conceyu meses alantre, na seronda, cuando escomienza a publicase nel semanariu una sección que lleva'l nome del colectivu y que va durar hasta'l final de la histórica revista. La fecha oficial de la fundación va llegar dos años más tarde, cuando se llegalice en 1976.

Acolumbrao dende l'agora, el llabor desenvueltu pola xente de C.B., inda nos plasma pola incomensurable actividá que desplegaron y nos más diversos frentes. El reivindicativu fue'l más notoriu coles sos campañes pidiendo 'Bable nes escueles' y 'Autonomía rexonal' –dos oxetivos que consideraben esenciales pa una Asturies democrática y cohesionada enriba la so propia identidá cultural–. Con eses conseñes entamó Conceyu una de les primeres manifestaciones masives permitíes, el 22 de xunetu de 1976 en Xixón. Otra estaya na que s'enfotaron foi na propia difusión y enseñanza de la llingua, promoviendo cursos o divulgandándola nos medios, como nel diariu EL COMERCIO, primero dende la sección infantil 'El Raitán' y después na nomada 'Estaya rexonal', qu'acabaría dando orixe a 'Alitar Asturies' en 1978. Otru frente importante de Conceyu fue l'editorial col asoleyamientu d'obres como les 'Normes ortográfiques', el 'Diccionario castellano-bable' de Sánchez Vicente y Fernández Poch, el 'Diccionariu manual bable-castellán' de Josefina Martínez o 'Llingua y sociedá asturiana' de García Arias. Xunta ellos, los llibros nos que fueron recoyendo les obres ganadores de los sos concursos lliterarios. La creación d'una Academia de la Llingua fue otra de les reivindicaciones qu'acabaría algamándose en 1981. Esi llogru diba marcar tamién el final de Conceyu Bable pa dar pasu a una dómina nueva que llega hasta güei y que nun fuera posible ensin la xera fundamental del colectivu al qu'agora se reconoz con un más que merecíu tributu.