El CMCA25, la cultura asturiana al so altor universal

Esta tarde (19.30 hores) clausúrase nel Aula Magna del edificiu históricu de la Universidá d'Uviéu el primer Congresu Mundial de Cultura Asturiana organizáu pola Academia de la Llingua Asturiana y coordináu pol antropólogu Roberto González-Quevedo. Entamáu cola collaboración de la propia institución docente que lu acueye y del gobiernu del Principáu, talo resaltaron na so apertura los máximos representantes de les tres entidaes, esti alcuentru ye un finxu trescendental y ensin precedentes n'Asturies que val pa poner los estudios académicos alrodiu la nuestra cultura y la nuestra llingua al altor universal que-yos correspuende y conectándolos coles estayes de conocimientu globales al mesmu nivel d'escelencia investigadora.

Alrodiu de dos centenares d'inscritos participaron nesti congresu nel qu'a lo llargo de cuatro xornaes más de sesenta espertos abordaron diversos temes de les sos respectives especialidaes nun alcuentru de clara vocación tresversal y fondamente venceyada a la realidá cultural, social, económica y territorial de la nuestra tierra: dende la etnografía y la investigación del patrimoniu oral al despoblamientu , el valir de los recursos naturales y culturales, la xeografía del paisaxe urbanu y rural, la glotopolítica y la sociollingüísitca, la hestoria o l'interceltismu. Toles comunicaciones presentaes nel Congresu van publicase n'entrambos volúmenes monográficos de la revista Cultures de l'Academia de la Llingua, un fitu material y documental d'esti primer alcuentru que va tar asina al algame de tolos que lo quieran consultar.