Cine asturianu, la verdá ensin filtro

Con títulos firmaos como 'Bernabé' (2013) y 'El Cobayu' (2018), Pablo Casanueva (Ribeseya, 1995), afirma que «suelo facer les películes n'asturianu y avezo trabayar con una voz n'off que ye la mía y fala nesa llingua, tamién cuando entrevisto a la xente, inda dexo llibertá pa que cada quién conteste na llingua que quiera». Sicasí, admite que cada proyectu requier un tratamientu singular y asina, na obra que prepara de cuantayá sobre l'ascensión al Urriellu de Pedro Pidal y El Cainejo, «trato de respetar la fala cabraliega de Gregorio y el castellán del Marqués. Aparte de reflexar esa realidá llingüística amuesa les sos diferencies sociales». De cualquier miente l'usu del idioma nel so casu «un actu normalizador, pero tamien de xusticia a la llingua na que pasaron les hestories que yo cuento», espresa.

Pioneru en rodar nel nuestru idioma y col so filme 'Cantares de una revolución' (2019), Premiu del Xuráu nel FICX, Ramón Lluis Bande (Xixón, 1972), tien claro que «un cine asturianu de ficción tien d'usar la llingua pa llograr una relación real col territoriu del que naz». Nel casu del documental reconoz que «la cuestión ye conflictiva. D'una banda hai películes feches n'Asturies onde l'español rechina, pero tamién creo que'l cine tien que reflexar los diferentes niveles de supervivencia del asturianu na realidá y si ye una llingua degradada, muestra esi momentu concretu, lo mesmo que puede espeyar cómo se mantién». El so idioma «ye siempre l'asturianu, na vida y nos trabayos. Sicasí nos últimos que son un diálogu cola nuestra memoria democrática, atópome con una historia d'Asturies que llegónos en castellanu: documentos o testimonios del 34 o del Conseyu Soberanu. Alteralo y sería una traición ética a la realidá. Tamién lo sería facer un trabayu como 'Vaqueros' n'español. El documental tien conectar cola realidá que quier reflexar y convertise en parte d'ella, sinón ye una falsificación», opina.