Secciones
Servicios
Destacamos
e.c.
Viernes, 10 de junio 2022
Daniel García Granda (La Pola Siero, 1972) ye profesor de secundaria y poeta. Tien collaborao como articulista nes páxines de EL COMERCIO cola so columna 'Que te vengo a ver'. En llingua asturiana tien asoleyaos los llibros 'Poemes del últimu salvax' (La Baragaña, 2012), con prólogu de Nacho Vegas, 'El Remediu' (Ruleta Rusa, 2015), introducíu por Sidoro Villa Costales y 'El raitán y el sangrín' (Impronta, 2020). En 2021 algamó el Premiu Fernán Coronas col poemariu 'Rosada 3.0. Monólogu interior con alumnos al fondu'. Ye autor, amás, de lliteratura infantil con títulos como: 'Versos d'Asturies' (2017), 'Amorina Motosierra' ( 2018) y 'Prau' (2022), tolos tres publicaos por Pintar Pintar. Alrodiu de la so forma d'entender la poesía, el propiu autor afirma que «anda a metá camín ente lo contemplativo y lo irracional, el pensamientu reflesivu y el sangrín, un calificativu qu'emplega non de baldre como títulu del so últimu llibru n'asturianu . Alrodiu d'esti últimu caltién que «hai poetes que caricien y hai poetes que solmenen. Y siendo asina, ¿quién fala más alto: el versu contemplativu o'l que surde ensin contemplaciones? ¿El cantu'l raitán o les berríes del sangre? Nestos poemes d'amor y rabia nun s'atisba griesca ente dos poetes antagónicos, sinón entendimientu. L'astraición nun poema escritu a la fresca andecha con una ramascada. Tamién con informantes qu'apurren emociones y conciencia. Asina, ente solmenones y afalagos, el poema faise paisaxe propiu, llugar nel mundu».
Güei tengo l'encamientu de presentar parte
del paraísu perdíu:
nel armarín d'abaxo hai un bote curruscos
bien enllenu, qué misteriu, siempre hasta la tapa,
por munchos que caigan mesmo que pedriscu en platu,
por munchos que chirchen y muerran flotando en caldu,
depués de la güerta, catar y mullir les cames,
y seyan bronce pulío o tuques de tarmos
ye bono char un chorru vinu tinto corriente
pa que l'oru la sopa sepa
atapecer
y surdan dente'l fumu paisanes como peñes
esbillando histories de partos mitolóxicos, los ocho
antebrazos tensos que carreten les cuyares
camín del cielu y suerben con fuercia
la pita y el vinu (yá arreciende a picadiellu)
tamién les mueles que falten ruquen los curruscos,
col vafu na ventana vuelven char otru vasu,
la truena yá dexó avisu penriba Trés Picus,
l'oru afumando calez el gargüelu y güelu diz
«Nun se pue esperar yá más. Mañana hai que matala»
Mañana… Nun voi meter mano nel bote curruscos
fondu como la infancia
y enllenu, qué misteriu, siempre hasta la tapa.
Un bramíu amatagáu llega de xunto al xatu.
Pola guapura dáime dalgo, andái, pola llocura
d'abellugase na monomanía del versu,
cháime'l vueltu
pola guapura, hai bayura
esperdigada pente esos requexos
que pocos ven y nos que nunca naide repara
qu'a la fin ye l'abandonu
el que me cinca de rodiyes y probe
de pidir m'emburria a espurrir la mano
pola guapura, fura
la mano puerca que cai al poema
mientres apurro la gorra romántica del día
pa volcala nel alma
flaneur de provincies o paisanu que t'engrifes
de la que pases al mio llau,
llectora fiera de güeyos tristayos,
neña que me mires bien adientro y tira
de ti la mano de la priesa,
cháime'l cambiu
de la verdá que sobra de la guapura,
cháime'l vueltu, andái:
ye too lo que me fai falta saber del mundu güei.
Munches, munches gracies, vida
breve: que Dios te lo pague con salú pa los tuyos.
Yo voi fundilo en fueu
onde prenda la guapura bien entrada la seronda.
Publicidad
Publicidad
Te puede interesar
Publicidad
Publicidad
Nuestra selección
Esta funcionalidad es exclusiva para suscriptores.
Reporta un error en esta noticia
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.