Tatexar

Gilles Deleuze imaxinábase a Jean-Luc Godard como un home que trabayaba muncho y, poro, que taba nuna soledá absoluta, pero non nuna soledá común: «Ye una soledá perpoblada. Non poblada por suaños, por pantasmes o proyectos, sinón por fechos, coses y incluso persones. Una soledá múltiple, creadora». Cuéntalo nuna entrevista nel númberu de payares de 1976 de la revista 'Cahiers du Cinema': «Dende'l fondu d'esa soledá, Godard pue ser él solu una fuercia, pero tamién trabayar con otros a común. Pue tratar d'igual a igual a cualquiera, poderes oficiales o organizaciones, pero tamién trabayadores doméstiques, obreros o llocos». Deleuze analiza la serie 'Six fois Deux' -una reflexón radical sobre les implicaciones polítiques de los medios de comunicación- y comparte colos llectores la so fascinación: «Nes emisiones televisives, les entrugues planteagaes por Godard tán siempre al nivel del interlocutor. Esmolécennos a nós, que les escuchamos, pero non a aquellos a los que se-yos planteguen. Cuando fala colos obreros nun lo fai como un patrón, nin como otru obreru, nin como un intelectual, nin como un director que falare colos actores. Y nun ye porque tenga habilidá p'adaptase a tolos tonos, ye porque la so soledá ufiérta-y una capacidá grande, una población mui numberosa». El filósofu asegura que'l cineasta suizu tien la capacidá de facer tatexar al llinguaxe, convirtiéndose nun estranxeru na llingua propia: «Polo xeneral, namás se ye estranxeru cuando se fala otra llingua. Nesti casu trátase, al contrario, de ser estranxeru na llingua propia». Y alcuérdase de Proust -«los llibros bonos tán escritos nuna especie de llingua estranxera»- p'asegurar qu'eso mesmo ye lo que se pue dicir Godard: «Esi tatexar creador, esa soledá ye lo que constitúi la so fuercia».