Los de siempre

Claro que nos reímos d'ellos. Yo'l primeru. Cuando yá d'aquella nun yeren nada pa reír. Vinieron pidime'l salón d'actos pa presentar el partíu. Como a cualquier otru, dióse-yos. La hestoria que contar vino'l día de la presentación. L'encargáu yera un conocíu de la mio quinta del que yá nos reíemos de críos porque al final del bachiller yera l'únicu que quedaba que vistía la camisa azul de la falanxe. Dos o tres años más tarde, cuando les primeres elecciones, aparecía nes fotos del mítin de Fuerza Nueva, al llau de la profesora de literatura española de la que tan poco aprendiéramos. Asina les coses, saludóme con munchu aquel y presentóme a los dirixentes del partíu. Tolo organizaben, nun había más que facer. D'esmenu, esti encargáu sal corriendo del salón d'actos a poco del empiezu y sube esmanáu a búscame. Faltába-yos la bandera España pa poner nel escenariu. Lo primero que-y dixi ye que nun teníemos banderes. Nin d'España, nin d'Asturies, nin de Mieres. Con gran disgustu marchó del despachu y fue dicí-yoslo a los compañeros. En vez de nun se perdonar a ellos mesmos nun llevar bandera, nun nos lo perdonaron a nosotros. Asina me lo ficieron saber al averame al salón. Qué desanxeláu quedaba l'escenariu ensin bandera! Nun dieron con nadie que tuviera una a mano na so casa pa traela. Llegaron a insinuame que se taba boicoteando l'actu. Nun se los veía nada contentos. ¿Cómo yera posible que nun centru públicu como'l nuestru faltara la bandera España?

Marché a tomar una cervecina pan un me reír más del asuntu. En nada llámame'l técnicu de soníu y dizme que, pa finalizar l'actu, necesitaben l'himnu d'España. Tamién s'escaecieran d'él. El técnicu, mui profesional, garró'l primer himnu que topó y llantó-yoslu de cierre. Podéis velu y sentilu en YouTube. Ye'l que suena al pasu de la Legión cola cabra al frente nun desfile d'esos nos que pasen como tiros. Asina sonó l'himnu. Como un tiru. Visto y nun visto. Tampoco-yos pareció nada bien. El fin de fiesta patrióticu malapenes duró 45 segundos. Claro que nos dio como pa reínos un cachu más. Agora vemos que nun yera nada de risa. Parecíanos que nun necesitaben más qu'una banderina pa escondese detrás d'ella y un himnu chunda chunda pa sentise realizaos. Ya vemos que non. Que-yos lo pregunten a los que los votaron en barrios como Returbiu o San Pedro. A ellos tampoco-yos val pa nada la banderina y el himnu. Pero, col so votu de rabia y descontentu, ehí los tenemos. En Mieres, un conceyal. En Llangréu, dos. Pa llorar. En Xixón, gobiernen. En coalición, pero gobiernen.