El primer Camín

El día de Santiago de 1975 llegué pela primer vez a Santiago de Compostela. Yera'l mio primer Camín. Aquel añu la estadística oficial diz que llegaron a Santiago 76 pelegrinos. Nun tamos acostumbraos a estes cifres. Tovía nun pasó mediu siglu y les cifres oficiales del añu 2018 anterior a la pandemia dan cuenta de que llegaron a Santiago 327.378 pelegrinos. Güei el camín de Santiago convirtióse nun reclamu turísticu de primera magnitú. Más de 2 millones de persones visiten Santiago tolos años. Pero la historia del primer Camín sigue siendo la mesma pa toos. La mesma pa Alfonso II fai 1200 años, pa mi fai 47 años o pa ti que pues ponete a facelo esti añu pela primer vez.

Cuenta la tradición que'l rei Alfonso II salió d'Uviéu a caballu camín de Santiago namás que-y dieron noticia de que sobre un campu brillara una estrella señalando la tumba del santu. Pero esi Camín ya llevaba millones d'años marcáu en cielu con un rastru d'estrelles que llamamos la Vía Láctea. Agora mesmo, l'escesu de lluz de les nuestres ciudaes nun nos dexa ver el cielu nin esi Camín milenariu marcáu peles estrelles. Pero, a lo llargo de los años y de los sieglos, gracies a esa guía única dibuxada en cielu, pelegrinos de tolos requexos d'Europa atreviéronse a emprender el Camín, de manera que dende tolos pueblos d'Europa había un Camín qu'arrancaba y qu'acababa en Santiago de Compostela. Hasta'l fechu d'entender qu'Europa mesmo nació como idea gracies a esos caminos que xunieron a tolos pueblos y a toles cultures del continente, Camín de Santiago.

Va poco más de 20 años tuve delantre de la fachada de la iglesia de Skofja Loka, a les afueres de Ljubljana, capital d'una Eslovenia qu'acababa de declarase independiente. Aquella fachada mostraba una enorme frase escrita que dicía: «Equí comienza'l Camín de Santiago». Y nun hai nada más cierto. Pa los vecinos d'aquel apartáu llugar de los Balcanes, ellí empieza aquel Camín máxicu hacia un destín que te marcaben les estrelles del cielu. Hacia un destín que siguen marcando les estrelles. «¡Ultreia! ¡Et suseia!», yeren les voces que se cruzaben los pelegrinos al pasu. «Ultreia» podríemos traducilo como «¡Entaína!» o «¡Tira p'alantre!». «¡Et suseia!» ye más complicao, pero vien a ser una contestación al «¡Tira p'alantre!» contestando «¡Y p'arriba!». O simplemente una manera de dicir «¡Aleluya!». Agora ye más fácil, dizse «¡Bon camín!». Y la contestación ye la mesma. Nun sé si al final alcontaréis a Santiago o, como cuenten bien de pelegrinos, vos alcontraréis a vosotros mesmos. Yo sigo buscándolu y buscándome.