Pijo

Lo de ser pijo nació en Mieres a primeros de los sesenta. Téngolo contao bien de veces. Uviéu yera una capital de provincia, invicta y heroica, pero murnia y gris. Xixón tenía playa, pero tuvieron d'esperar a que fueran a bañase los de Les Cuenques pa qu'aquello garrara ambiente. Avilés nun contaba porque yera más feo que Sama y La Felguera xuntes. El Mieres pijo d'época tenía una serie de santuarios únicos: El Paláu, el Capri, el Yaracuy, el Gardens, el Babys y Il Gattopardo. Había perres, bien de perres, y bien de poco sentíu en gastales cola ostentación del desprendíu. La banda sonora poníenla los Beatles, pero también Adamo, Rita Pavone y Los Archiduques. El que quería pasalo bien, a la manera que se veía nes películes, venía a Mieres. Un día va bien d'años conté-y esto a Camilo, nel programa 'Mochileros', faciendo'l Camín d'El Salvador: bien de xente que vio'l programa nun se quedó col fechu de que ficiéramos esta variante del Camín de Santiago sinon namás na hestoria que conté de los pijos.

Barcelona yera la única ciudá española nesi tiempu con capacidá pa ser una ciudá europea y ellí, como ser moderno naquel tiempu significaba ser d'izquierdes, a los pijos acabaron llamándolos la 'gauche divine'. De dereches dereches quedaben los de siempre, los que mandaben dalgo na OJE, los profesores de formación del espíritu nacional, los prubinos a los que se-yos pasara l'arroz de los tiempos y los que callaron como afogaos p'acabar votando con tiempo a VOX o asemeyaos. En Mieres los pijos más concienciaos ficiéronse del MC y acabaron n'IU, los más divinos terminaron nel PSOE y polos resultaos de les elecciones municipales se fue viendo que los de dereches acabaron engañándose a ellos mesmos diciéndose de centru.

Tiempu alantre, depués de desmantelar la fábrica, la invasión de mierenses en Xixón y d'estudiantes n'Uviéu, acabó convirtiéndolos a la pijería. Pa los de Mieres dir a Xixón o a Uviéu yera nun salir de casa. Agora mesmo, cuando Mieres yá nun ye nada, Uviéu y Xixón siguen siendo na conciencia de la xente el patiu d'atrás. Y nun se dan cuenta que nin siquiera'l patiu d'atrás ye nesti momentu nin pijo, nin guapo, nin nada. Si acasu pa lo osos y los xabariles. Nin siquiera pa los perros, agora especie persiguida en Mieres cuando siempre fueron la so seña d'identidá por excelencia.