Persecución

Iván caminaba pel monte escuchando un podcast y aprovechando'l sol y la bona temperatura. Yá taba la seronda a la vuelta la esquina y, depués de cuatro díes siguíos lloviendo, tenía ganes d'esparder y ver daqué que nun fuera la paré de la ... casa qu'arrendara pa pasar un par de selmanes de les sos vacaciones. Prestaba-y dir solu siempre, el so amigu Tomás insistió-y muncho pa que fuera con él y cola moza que marchaben pa dalgún sitiu en Levante, pero non, lo qu'Iván quería yera escaecer tolos compromisos del trabayu y la vida en xeneral, pensar nes sos coses y dir a un ritmu que fuera namás que suyu. Les vacaciones que quería Tomás yeren xusto lo contrario a lo qu'él buscaba, cola folixa, el xentíu y too eso. Nun ye que Xixón seya una ciudá grande, pero tenía'l suficiente tamañu y volume de xente p'aforfugalu y hasta allorialu a vegaes y él esperaba a que llegaran les vacaciones como agua de mayu pa poder fuxir d'ellí y tar tranquilu, sintiendo namás qu'a los páxaros, el ruxerrux de les fueyes, el cruxir del fueu na cocina carbón, o la lluvia cayendo cuando pintara. Nun ye que fuera antisocial, pero necesitaba aisllase dacuando. Pensaba qu'había demasiaos seres humanos nesti mundu y nada yera meyor qu'alcontrar un requexu onde nun hubiera nin un alma. Hai yá un par d'años que dio col sitiu perfectu. Yera una cabaña madera apartada en metá un monte nun conceyu l'occidente, onde malapenes había habitantes y, a nun ser que fuera al pueblu que yera la capital, onde vivía la paisanuca dueña de la propiedá, nunca se crució con naide nin vio otra cosa que nun tuviera cuatro pates o plumes. Un ríu non mui grande pasaba per detrás, cosa que-y encantaba, por aquello de dormise sintiéndolu, y tenía tantos árboles alredor que nun se vía la casa hasta que taba a tiru piedra. Había un par de díes tando dientro fregando los cacharros, vio un osu que pasó como a diez metros, Iván quería más eso que-y tocara la llotería. Yá taba la señora medio convencida pa que-yla vendiera, ella tenía fíos y nietos, pero nun-yos interesaba aquella casuca pa nada, asina que tampoco ye que tuvieran a la escontra, más perres pa la herencia si la vendía y un problema menos pa ellos pal futuru. Acabó'l podcast sobre semientes y colleches. Si conseguía la cabaña, de xuru que pondría una güertina y tenía qu'aprender, que nun tenía nin idea. Quitólu y pensó que yera hora d'escuchar música, una cosa sele tipu música celta, pero de lo lento y relaxante. Dexó d'andar y echó una güeyada pela redolada mientres alendaba bien fondo, aquello sí que yera vida, nun ye que tuviera muncha suerte col tiempu esi añu, pero momentos como esi compensábenlo too. Estiró tol cuerpu y pegó un sospiru de puru contentu mientres-y echaba mano al móvil pa buscar lo que quería. Entós paeció-y sentir daqué que lu punxo sollerte. Sacó los auriculares de les oreyes pa poder escuchar meyor. Sí, unos cruxíos na foyarasca dexaben claro que nun taba solu, había dalgo más y bien cerca. ¿Sería un animal xabaz, l'osu d'hai dos díes? Nun-y apetecía nada alcontralu ensin abellugu nengún, ye más, nun sabía bien cómo tenía que reaccionar si lu atopaba, porque si cuerres, malo, porque entós escórrete y nun ye que seyan lentos, esguilar a un árbol tampoco, porque ellos tamién puen facelo y meyor que tu, hasta naden bien y rápido, amás tampoco ye que tuviera mui en forma p'aguantar una carrera llarga de sópitu y quedase quietu nun-y paecía bona idea pa nada. Afinó l'oyíu y seguía sintiendo los ruios cada vez más cerca y taba claro qu'una cosa pequeña nun yera, tenía un tamañu importante. Ensin saber qué facer, pero tando claro que tenía que movese yá, escondióse detrás d'un árbol a esperar a ver qué yera, muertu mieu. Taba bien lloñe de la cabaña y si salía del camín principal, igual hasta se perdía. Entós apaeció, paecía una muyer mui moza, poco más qu'una neña, con un vistíu blancu y tan roxa que casi daba en blanco. Tenía la piel mui esblanquiñada, nunca viera a naide asina y paecía que taba sola. Alliviáu salió de detrás del árbol y dixo-y «hola», a lo qu'ella nun fizo otra cosa que parar en seco y miralu ensin parpaguñar. A Iván dio-y un respigu, había dalgo n'ella que nun yera normal, nun yera sólo que nun se sabía si tenía pies polo llargo'l vistíu, cosa na que taba acabante de fixase, sinon que los güeyos paecíen tener un color raru, asemeyáu al colorao. «¿Hola?», dixo otra vegada notando cómo-y tremaba la voz. Entós ella susurió daqué estraño que nun entendió con un tonu voz que fizo qu'Iván nun aguantara más y echara a correr nel intre. Cuála nun sería la so sorpresa cuando miró p'atrás y vio qu'ella lu perseguía. Soltó un glayíu y fizo por nun empatonase con nada y esquivar tolos árboles y matos varios tolo rápido que podía. Ella yera rápida y pa cuelmu agora taba gritando-y una serie pallabres que nun entendía, igual taba invocando a dalgún demoniu o vete tú a saber, igual yera un demoniu ella o una pantasma, Iván siempre creyera n'eses coses. Nun sé cuántu tiempu duró aquella persecución, hasta que cuando él pensaba que nun podía más, miró y vio qu'ella yá nun taba.