Perru

Habrá poques coses que presten más que mexar nes escaleres del Liberbank, que facer artes mayores nos soportales del Ayuntamientu, que lladrar a los coches de la Policía local y a los autobuses municipales o que saludar al alcalde o al presidente y nun dase ... nenguna importancia porque nesi momentu lo dafechamente importante yera una perrina d'eses d'agües que pasaba a la vera y cola qu'había qu'aparar un ratu. El mio fíu Abel quier matame cuando me ve paseando con perru porque tola vida quixo tenelu y nosotros que salíamos de 16 años de convivencia con una gata de nome 'Xira' y enantes un perru que se llamaba 'Aristóteles' decidimos que yera meyor esperar y entemedies de la espera acabamos nun teniendo más compañía que nosotros mesmos. Hasta agora que poles vueltes que da la vida acabé viviendo con una muyer que tien perru y asina se me ve acompañándolu na so reivindicación d'accesu pa minusválidos a les puertes del Liberbank, d'una ordenanza pa perros con más parques y menos multes y demás asuntos a los que se dedica polo xeneral un perru nesta villa perruna por excelencia na que se ye d'equí si se tien unu y tien cadena. Y estes coses que fai un perru como perru cuéntoles con conocimientu de causa porque lo de mexar nun lo fai enxamás na Caixa nin nel Sabadell, por poner otros exemplos, pero tien especial procuru a facelo nel Liberbank. Como lo de les artes mayores nos soportales del nuestru Ayuntamientu, demientres nun se-y ocurre notros como los de Villaviciosa o Uviéu que tamién los tienen. Lo que sí ye xeneralizada ye la tirria a los coches de la Policía local y a los autobuses municipales, que fai estensible dacuando a otros cuerpos de seguridá y a otres llinies de tresporte públicu.