Una película invisible

El 12 d'agostu de 1937, Aureliano Guerra Rivera, secretariu de Cultura de l'Agrupación Socialista de Xixón, presentaba al Comité de la so organización una propuesta pa filmar una película que recoyere «dalgunos aspectos de la guerra en Xixón». El Comité aprebó facer les ... xestiones necesaries col Conseyu d'Asturies y Lleón pa que'l rodaxe fuere una realidá. La propuesta señalaba dalgunos d'esos aspectos de la guerra que tendríen de protagonizar el metraxe de la película: la zona destruyida del cuartel de Simancas, los edificios castigaos polos cañonazos del 'Cervera', diferentes aspectos de l'actividá industrial, les actividaes portuaries, los hospitales de sangre y la vida escolar, reflexando tamién les clases albentestate na playa y nel campu... El cineasta, qu'atopa esta información nuna noticia breve nel diariu 'Avance', pregúntase pol destín d'esa película. ¿Llegaría a rodase? ¿Quienes foron los sos responsables? ¿Esistirá anguaño dalguna copia en dalgún sitiu? La historia del cine ta enllena de películes que nun esisten. Naum Kleiman, director del Muséu de Cine de Moscú, foi'l primeru en defender la necesidá d'emplegar una metodoloxía negativa pa la reconstrucción del cine del sieglu XX. L'espectador que quiera conocer la producción cinematográfica soviética d'esi tiempu, por exemplu, tien de contemplar nun planu d'igualdá y análisis lo mesmo les películes que se ficieron como les que nunca llegaron a realizase. El cineasta piensa qu'esa película invisible de la guerra en Xixón tendría de ser como la nuestra 'Bezhin Lug' (1937), aquel filme d'Eisenstein que, pesie a que namás vieron el so director y los censores que lu secuestraron, tien una presencia central, cuasi fantasmagórica, mayor incluso qu'otros clásicos que se proyecten de siguío.