Madrid Navidá

Hubo un tiempu nel que la meyor manera de dar una vuelta per Madrid y nun topar con nengún madrileñu yera facelo nestes feches previes a la Navidá o na Navidá mesma. Agora da lo mesmo. Nun topes nengún madrileñu, pero topes a monteneres de turistes faciendo tolo que-yos dicen les guíes turístiques que faen los madrileños. Y nun ye verdá que lo faigan. Más bien tolo contrario. Pero ellos créenlo y, faciéndolo, piensen que percorren el Madrid más auténticu. Faen coles enormes en Doña Manolita, dalgo qu'enxamás fai un madrileñu. Asina ye que, cuando toca, enxamás-y toca a un autóctonu. Lo cierto ye que, en xeneral, los d'equí nun pisen Preciados nin la Puerta'l Sol. Sobre too, cuando les campanaes oficiales. Yá nun caben nin siquiera los que vienen de fuera. Los que lleguen tarde, nun entren. Y lleguen tarde porque tan intentando aparcar cerca de la Puerta'l Sol. O intenten averar al centru na llinia de metru de Joaquín Sabina: Tirso de Molina, Sol, Gran Vía, Tribunal. O, peor vos lo pongo, baxen en Tirso de Molina a escuchar psicofoníes pegando la oreya a los azulexos blancos de la paré. Cuando ficieron la estación toparon con un cementeriu de monxos. Pa Iker Jiménez ye ún de los sitios más auténticos de tou Madrid.

Los turistes que tienen la suerte de tar unos pocos díes más y tienen más tiempu pa facese los madrileños de manual, cuenten con más sitios que ver nos que nun topar a nengún madrileñu. Por exemplu, faciendo una cola más llarga que la de Doña Manolita intentando comprar un bocata calamares cerca de la Plaza Mayor. O, peor vos los pongo, dando una vueltina nes barques del Retiro. O, peor que peor, buscando los llugares auténticos de la Movida madrileña a les tantes de la madrugada. Estos tres casos son emblemáticos. Montando nes barques del Retiro nun garres más qu'a parexes de novios de La Mancha, La Manchuela, L'Alcarria o Los Sexmos de Segovia. Dando la vueltina polos llugares de La Movida nun se topa más qu'a periféricos peninsulares y a una montonera d'ingleses ya irlandeses de despidida de solteru. Y, lo más alucinante, lo del bocata calamares, que namás comen los coreanos, los xaponeses y los chinos de Taiwan.

Toi pel centru. Pel centru mesmu. Acabo sentir acentu madrileñu. Ye un ciegu vendiendo'l cupón de la ONCE. Tolos demás acentos son tolos acentos del mundu. Diz la prensa que yá pasen del millón los llatinoamericanos. Son los madrileños más auténticos colos que topo. Los que tan trabayando pa que los turistes piensen qu'esto sigue siendo Madrid.

• Temas
• Alitar Asturies