L'encuadre de la vista

El profesor llevó a los sos alumnos d'escursión a unes dunes. Mandó-yos que se sentaren en suelu. Enfrente había agua. El maestro sentó a los alumnos nun sitiu determináu y mandólos esperar. De sutrucu, apaeció un páxaru. Entró nel so campu visual, nel ... so ecuadre, y desapaeció. «¿Visteis eso? -preguntó-yos el profesor- Lo maraviyoso ye cuando nun s'enseña too. Dexes que'l páxaru apaeza y desapaeza. Cuando desapaez, la cabeza entama a trabayar. Eso ye lo más importante». Como un vieyu maestru oriental, el profesor trabaya colos alumnos el sentíu de la percepción del espaciu: anticipación, preparación, elección del momentu... El profesor esplíca-yos que lo esencial ye nun intentar escosar l'espaciu visible d'una güeyada. Ye más interesante ver la realidá d'una manera parcial. Descubrir les coses pali que pali al traviés d'acciones pequeñes al percorrer l'espaciu. «Les coses implícites son muncho más riques, interesantes y esperienciales que les esplícites, onde too ta a la vista», diz-yos. Al profesor, que ye tamién arquitectu, siempre-y prestaron muncho les ventanes pequeñes nes construcciones que diseña: «Les ventanes pequeñes eviten la visión de conxuntu y obliguen a afitar l'atención del que mira nos detalles. La parte d'un too que podemos pensar». Como nes pintures d'Utagawa Hiroshige: la caña d'un árbol, el detalle de la espluma d'una fola, l'ala d'un páxaru en cielu... El cineasta traduz toes estes idees nel cuadernu: «Espresar mucho, filmar poco. Que too funcione bien y de manera cenciella. Simple pero precisa». Tamién apunta otra idea del arquitectu Richard Lepastrier: «Munchu tiempu de preparación: caleyar, observar, sentir, lleer... y, depués, cuando lo tienes que facer, faeslo ensin volver a pensar nello».