L'arte de mirar

Nos díes llargos del confinamientu, Apichatpong Weerasethakul piensa nel futuru del cine mentanto prepara l'almuerzu: un platu con fruta, cereales con llechi y un par de güevos duros. Lo primero que-y vien a la cabeza ye la palabra viaxe. Cómo cambia la nuestra ... percepción del viaxe de la que vamos medrando. De neños la nuestra mente inquieta oblíganos a facer entrugues tol tiempu: ¿Falta muncho? ¿Cuándo llegamos? ¿Yá lleguemos?... Col pasu'l tiempu dalgunes persones deprenden a esfrutar del viaxe y de tolo qu'esti ufierta: «Observamos los árboles, les cases, les señales, los otros vehículos... avezámonos a tar tranquilos nel viaxe. Sabemos qu'hai un destín», diz Weerasethakul, que cree que la esperiencia del andanciu pue potenciar la capacidá d'eses persones de permanecer nel momentu presente más tiempu qu'otres. Eses persones van poder mirar les coses mentanto munchu tiempu. «Cuando'l futuru ye inciertu, l'agora tórnase valiosu». Al tiempu, entamen a dominar l'arte de mirar -entrenáu al traviés del usu del planu-secuencia estáticu nes videollamaes- y yá nun quieren consumir les imáxenes banalizaes que-yos ufierta la industria del entretenimientu. Tan cansaos hasta l'arcada de la monoforma impuesta poles plataformes. Incluso, diz Apichatpong, estos espectadores piensen que'l cine lentu de Béla Tarr, Tsai Ming-Liang o Pedro Costa ye rápidu abondo: «Desiximos cero trames, ensin movimientos de cámara, ensin cortes, ensin música, nada», glayen. Y nesi momentu, inventen el cine del futuru, que vuelve ser peligrosu. Los espectadores recuperen la capacidá de ver: les cañes d'un árbol ximielgaes pol aire, les foles seles de la mar al llegar a la sablera, el tren que llega a la estación o los trabayadores que nuna mañana espeyada salen de la fábrica.