Xunta Xeneral

Como ellos representen a primera vista la esperanza y l'espíritu emprendedor d'esta tierra –non en vano toos ronden y rondamos los 65, cuando non los 70 años–, yo apúntome con decisión, non ensin enantes plantear delles cuestiones previes.

La primera: ¿Ónde tuvistis metíos hasta agora? Porque ye que los conozo dende guajes a la más grande parte d'ellos y siempre fueron mui bona xente, implicaos n'hestories culturales interesantes y dellos con un nome y una sonadía dientro d'esti mundu cultural asturianu tan escasu y escosu. Entós, de mano, la pregunta ye ofensiva. Porque claro que sé per ónde anduvieron toos metíos. Porque claro que los almiro. Pero la pregunta, echando la vista atrás ensin ira, refier a qué ficimos en xunto non a lo que ficimos cada ún pel nuestru lláu.

La segunda: ¿Paga la pena nesti momentu facer dalgo? La respuesta ye clara: siempre paga la pena facer dalgo. Pero, como siempre fui el más positivu en toles hestories, planteo tolo negativo. Ye la mio manera de poder siguir siendo positivu. Y yá que lo que peor tá na nuestra Asturies ye la política, les primeres cuestiones que planteo son polítiques. ¿Paga la pena plantear dalgo nesti momentu nel qu'una burrafa d'ideoloxía como la de Vox tien 4 diputaos na Xunta Xeneral? ¿Paga la pena cuando de milagru nun tan gobernando xunto a los 17 diputaos qu'algamó'l PP? ¿Paga la pena fiar en dalgo del PSOE que cuenta con malapenes 19 diputaos y sostiénse col gabitu de los 3 de la mecigaya IU-MásPaís-IAS, cuando tuvieron bien de veces diputaos suficientes como pa facer dalgo solos y nun lo ficieron? Y, tovía menos, ¿sigue pagando la pena pensar na posible esistencia d'un partíu a la manera del Bloque Nacionalista que tenemos equí a la vera en Galicia, del Partíu Nacionalista que lleva media vida nel País Vascu o, mesmo, del Partíu Rexonalista de la vecina Cantabria?

Pues, a lo que voi. Comer, comimos. Beber, bebimos. Falar, falamos. Llegar, lo que se diz llegar, nun llegamos a nengún alcuerdu. ¿Por qué? Cada vez creo más nello: porque somos asturianos y, como bonos asturianos, nun vamos llegar enxamás a nengún alcuerdu. Y, tamién, porque a estos altores, naide piensa de verdá que pague la pena perder más tiempu nello. Nun se trata de ser negativu, nin de tar desilusionáu, nin cansáu siquier. Si acasu, de tar triste.