Parque Aníbal Vázquez

Tomábame'l pelo bien de veces l'alcalde Aníbal Vázquez de la que me veía paseando al perru. Más que nada porque lu llevaba siempre comigu daba igual a lo que fuera, a una reunión na sala de plenos del ayuntamientu, a comprar na plaza d'abastos o a una xestión nel bancu. Y contestába–y yo que menos rises, que la gloria ye un parque que caguen los perros o una estatua que caguen les palombres. La frase tien autor. Pero, como toles frases, si la busques en Google, topes tres o cuatro autores diferentes. Colo que, siempre acabes quedando bien si dices la frase que te dea la gana y acabes apostillando 'como dixo Lord Byron'. O de nun t'apetecer un autor inglés, indiques 'como dixo Miguel de Unamuno', y tamién val. Anque, viendo lo que veo n'internet, lo meyor ye echa-y la culpa de la frase que quieras a Walt Withman. Ye una autor que lo aguanta too.

Güei, el parque de La Mayacina de Mieres pasa a llamase oficialmente parque Aníbal Vázquez. Por más que la xente vaya siguir llamándolu parque de La Mayacina. Y, nel fondo, a Aníbal Vázquez–y dea lo mesmo a estes altures tener un parque a nome d'él. Nun sé si voi dir a la inauguración, pero lo que sí voi facer, como tolos díes dende va tiempu y dende enantes de que'l parque fuera un proyectu siquiera, ye dar un paséu col perru pa que faiga artes mayores y menores onde–y pete. Podrá gústate o non el parque, pero ye d'agradecer un espaciu asina nel mediu Mieres. Yo tengo años asgaya pa recordar como yera enantes, ente les montañines d'escombrera de carbón, la canal de Santa Marina, la fábrica d'Aguínaco, y les cases de Vasco y del ferrocarril de Barreo. Esti 12 del mes de san Xuan cumplíense cuarenta años de la muerte de mio padre, que fuera maestru de les escuelines de Santa Marina y que, de la que cruzábamos les víes pa llegar a elles, dicíame: «Esto ye'l futuru de Mieres».

El futuru en Mieres ye dalgo que tarda muncho en llegar. Y cuando llega, el futuru yá ye otra cosa. Del proyectu de La Mayacina yá se falaba va mediu sieglu. Acabó pasando como nel cantar que suena nel carillón del ayuntamientu: «Hermosa villa de Mieres / que guapina vas a sere / con el encauce del ríu / y el parque que van facere». El parque del que fala'l cantar ye otru. Pero tamién serviría pa ésti. Prestábame enforma más qu'Aníbal Vázquez tuviera equí pa siguir tomándome'l pelo. Y tamién pa ver que la xente-y guarda'l suficiente cariñu al so recuerdu como pa dar nome a un parque. Anque, la verdá, de tar vivu tamién diba reise una montonera de los que ficieran una propuesta como ésta.