Los fíos de la desmemoria de Villa apoyen a Trump

Nel viaxe anterior a los USA llevara pa lleer 'Una casa de tierra', de Woody Guthrie. La única novela qu'escribiera. Inédita dende'l añu 47. Taba d'aquella acabante publicar. Agora, otra vuelta más camín de los USA, de la que lleo 'En llucha ... incierta' vuélveme a la cabeza la so canción 'Blowin' Down the Road': «Voi ande nun soplen tormentes de polvo / busco un trabayu y una paga decente / voi per esta carretera polvoriega / y enxamás me van tratar d'esta manera». El mio amigu Michael Lee Wolfe canta otra sobre eses mesmes tormentes d'arena. Hai munches. Falen d'un tiempu. Esta canción podría tenela escrita John Steinbeck. Como banda sonora pa esta mesma o pa bien d'otres noveles d'él y que falen d'aquelllo. Nesti momentu ye'l llibru perfectu pa traer a Miami. Onde nadie sabe yá quién fuera Steinbeck. Si acasu, dalgún memoriosu s'alcuerda de la película 'Las uvas de la ira', de John Ford. Y eso porque ye bien mayor y sabe tovía quién fuera Henry Fonda. Pero, del argumentu de la película, nada de nada. Como de 'Al este del edén', porque trabayaba James Dean. El memoriosu ye 'latino'. Lleva una camiseta d'apoyu a la campaña de Donald Trump. Toos nesti Miami que fala español lleven camisetes, banderes y gorres d'esa campaña y d'esi candidatu. 'En llucha incierta' ye nesti sentíu un llibru anacrónicu. Dalgo que se pue lleer siendo asturianu fuera de casa. Pero del que nun saben nada los propios d'esti llugar. Y cuando digo 'propios' tendría de ponelo ente comines. Porque son los mesmos inmigrantes de la novela de Steinbeck. De tantes otres noveles d'él. Los mesmos qu'agora apoyen a Trump. Que nun saben un cantar de Guthrie. Que nun saben quién fue Woody Guthrie siquier. Nin que la so guitarra mataba fascistes.La versión n'asturianu de Daniel García parezme magnífica. Faímela tan cercana que dame la sensación de tar falando coses más que nuestres. Esta llucha na que participaron tantos de los nuestros. Como participaron los güelos d'estos inmigrantes qu'agora apoyen la campaña de Trump. Miami ye Asturies. Los fíos de la desmemoria de Villa y del SOMA son los mesmos qu'apoyen a Trump y a los republicanos. 'En llucha incierta' fala de nosotros. De la nuestra tierra. De la mierda na que-yos va tocar vivir a los nuestros fíos. Y na que van tar felices de facelo. Parezme tar viéndolo.