Cantares y cancios

La palabra canciu, mui poco estendida, refería cásique siempre a un cantar d'escasa categoría. Lo que de mano fuera un términu con un ciertu componente despectivu acabó designando a mediaos de la década de los setenta del sieglu XX l'espíritu de renovación de la canción asturiana a partir d'una serie d'intérpretes que pasaron a nomase Nuevu Canciu Astur. D'esta manera, canciu y el so plural, cancios, acabó dando nome al nuevu tipu de canción interpretada n'asturianu por grupos como Nuberu o cantautores como Xulio Ramos o Carlos Rubiera.

Tradicionalmente, el nome xenéricu col que se designaba y designa la interpretación de cualquier tipu de canción ye cantar. Asina, los cantares más populares interpretaos de forma espontánea pola xente en chigre llamáronse cantares de chigre. Porque cantar ye a la vez verbu y sustantivu. Como cantar ye también el rinchar de les ruedes del carru rinchón. Y cantador, o cantador de la quintana, ye la manera xeneral de designar al intérprete de canción asturiana. A lo llargo del sieglu XX, el términu fue cayendo en desusu y malapenes dellos autores continuaron aferrapos a l'antigua denominación, como José Luis Marcilla nos sos llibros dedicaos al Concursu Ciudá d'Uviéu. Asina, la propia asociación más grande de cantadores pierde'l nome tradicional y pasa a llamase AICA, Asociación d'Intérpretes de Canción Asturiana. La primer referencia qu'esiste d'esti tipu d'intérpretes de canción asturiana aparez na enciclopedia 'Asturias' (1894-1901), de Bellmunt y Canella, y llámaselos cantadores de la quintana.

Del mesmu raigañu empleamos otros términos, como cantadera, cantarada, cantarida, cantariegu, cantarín, cántica, canturiar y cantusa. Cantadera ye l'actu de cantar la xente, como también el de tar de fiesta y folixa, poque se sobrentiende que tuvieran cantando. Cantarada son dos coses: el propiu actu de cantar; y la serie de cantares o tonaes qu'un cantador canta siguíes. Cantarida refier principalmente al fechu de cantar con fuerza. Cantariegu ye la persona a la que-y presta cantar abondo. Cantarín ye'l nome que se-y da a un cantar intrascendente o d'escasa calidá. Cántica, amás se ser sinónimu de cantar, refier al cantar que lleva acompañamientu musical. Canturiar define l'entonar en voz baxa y también el cantar a la oreya. Y, el términu más específicu onde los haya, cantusa, refier al cantar que se siente de lloñe, polo xeneral durante la nueche y del que malapenes llega a la oreya más qu'un marmullu. Como también la expresión cantar por, que se diz d'aquellos cantadores qu'asonsañen la manera de cantar de dalguién, diciendo canto por El Presi o canto por La Busdonga. En xunto, bien de términos como pa falar de bayura. Pa falar con propiedá.