Asturianonos

Vuelvo de sitios guapos nos que tar a gustu. L'últimu d'ellos bien al sur, enllenu de lluz, atacáu de bon tiempu, con munches ganes de fiesta y d'antroxase. Tan enllenu de lluz y calor como p'andar siempre penriba de los 20º. Con tantes ganes de fiesta y d'antroxu como dan xintar con fino y cenar con palo cortado y, al día siguiente, xintar con manzanilla y cenar con cream. Y asina sucesivo. Ensin escaecer los tintos de la tierra. Y honrando siempre, mañana, tarde y nueche, los chicharrones.

Un llugar increíble nun momentu increíble, hasta que pasa una familia a la vera nuestra y sentimos dicir a ún d'ellos: «Tamos a 28º, esto nun pue ser bueno». Correcto, sé lo que tas pensando: tá pasando per delantre nuestra una familia d'asturianonos. Nótase nel tonu repunante, nel aire babayu, nel espíritu grandón. Namás-yos falta'l puntu faltosu y, entós, asturianonos dafechu.

La cosa va pa peor, siéntense na mesa apegada a la nuestra. De xemes en cuando viennos dalgún comentariu. Nun ye mester tar mui atentos, falen a l'asturiana, al altu la lleva. L'asturianu nun dexa de ser un toreru de la palabra: siempre fala pal tendíu. Diz la cabeza familia: «Menudu stress da el nun tener nada que facer». Con un cometariu adicional sobre'l tiempu: «Esti aire tá asquerosono, mira qué pelos». Y mencionando la presencia de dos nubines piquiñines y algodonoses na raya del horizonte: «Esti día nun acaba d'abrir del too». Asina como dalgún apunte culinariu: «Sentóme mal la paella d'ayer. A ver ésta». Porque sí, taben pidiendo otra. La d'ayer arroz caldoso y la de güei de nun sé qué, pero mui bona pinta cuando-yos llegó. Y amestando comentarios sobre'l fechu de que nun reservaran y-yos dieran mesa a la primera: «Esto, con xente, tien de tar horrible». Pa terminar, como nun podía sermenos, falando de dalgo relacionado colo mal que tan les coses de cara al futuru: «Nun sé qué va ser de los nuestros probes fíos si gobierna ésti tres años más». Ésti, al que se referíen col términu ésti, taba saliendo na tele.

Ventilen los entrantes, la paella y los postres, amás d'un par de botelles de Barbadillo, doble ración de pan y picos, y una botella d'agua de llitru y mediu. Piden la cuenta: «Nun se t'escurra dexar propina». Vuelve ún del wáter: «Quítensete les ganes de mexar». Y, de la que marchen, como destín turísticu del día, el camareru indíca-yos qu'hai una narcolancha varada na playa de La Barrosa, ellí delantre. «Voi subir una foto a Facebook», diz el guaje. «Fai un tik-tok, anormal, que Facebook nun lo ve nin dios». Y, gracies a dios, marchen.