Gobiernín

DLa palabra asturiana gobernín siempre me llamó muncho l'atención. El DGLA (Diccionario General de la Lengua Asturiana) defínela como persona aficionada a manipular y a dirixir los negocios ayenos. El DALLA (Diccionariu de l'Academia de la Llingua Asturiana), tamién va na mesma llinia, definínela como persona dada a metese n'asuntos ayenos. Añado a les definiciones un componente políticu más: el mesmu fechu de que'l términu gobernín tea relacionáu directo con gobiernu. Y nel sentíu de que, nel ámbitu de la cultura, nun dexamos de tar arrodiaos de goberninos. Unes vueltes más qu'otres. Pero, siempre con cada cambiu de gobiernu.

La cultura sigue viéndose dende la perspectiva romana de «panem et circenses». Da igual el que gobierne. Nesto nun hai dereches nin izquierdes. Los goberninos son especímenes que proliferen nos dos llaos del espectru. Demientres más a la derecha o a la izquierda del espectru, más s'asemeyen. A más grande radicalidá, más gobernín. Falando de manipulación cultural, Antonio Gramsci explicó que l'actual clase social nel poder llogra consiguir la hexemonía de la sociedá imponiendo la so axenda, les sos necesidades y prioridaes -la so visión del mundu- a tola ciudadanía. Correcto. Anque Gramsci lo analice dende la izquierda, sirve pa les dos manes. Más que nada porque depués el mesmu Gramski cuidaba que la clase social dominada diba tener que reaccionar ante semeyante treta política articulando'l so puntu de mira nel conxuntu d'explotaos nuna amalgama d'idees pa producir la contrahexemonía. Tamién correcto, de xuru. Anquen nun lo veamos.

Y toa esta intro tan culta pa venir a dicir qu'esta semana xunté con compañeros de la xestión técnica cultural. Nun ye que vayamos a peor. Ye que la vida sigue igual. L'escalafón más baxu y más anodín de la política, el qu'ocupen los conceyales municipales, acaba apropiáu polo más ilumináu de cada partíu. Iluminaos de dereches y iluminaos d'izquierdes. Pero siempre iluminaos. Xente que piensa que sabe. Lo peor que se pue pensar. Xente que nun se da cuenta que tá de pasu. Que, a los diez díes de dexar el cargu, naide los va echar de menos, naide se va alcordar d'ellos. Y, na llinia de lo que comentaba enantes, si los iluminaos nos lleguen de los dos extremos, avances un pasu más. Como si fueran miembros d'un movimientu pentecostal, desciende sobre ellos l'espíritu santu, y como nuevos apóstoles, empiecen a falar con especial procuru de tolo que desconocen. Sentando cátedra. La cátedra del burru, que dicía mio güelu Ismael, que rebuzna y piensa que fai música. Esta ye la meyor definición de gobernín: políticu fatu que cree que sabe gobernar.

• Temas
• Alitar Asturies