De Xixón

Munchu cuentu con que Xixón ye otra cosa y Uviéu ye lo que ye. Al final, yá se ve. Xixón nunca va poder ser un ciudá que pinte dalgo, por más que sueñe ser Donostia o A Coruña. Donostia nun s'avergoña de llamase Donostia, amás de llamase San Sebastián. Como A Coruña de ser A Coruña y que yá naide s'alcuerde de decir La Coruña. A nun ser dalgún patán d'esos que tovía diz Ferrrol del Caudillo. La cosa yá empezó dir mal con aquel alcalde reveníu del PC qu'acabó arimándose al PSOE y, pa más inri, de presidente del Principáu. Llamábase, pa los que lu escaecieron, Vicente Alberto Álvarez Areces, 'Tini' pa los camaraes, los conocíos y los pasamanes pel llombu. Enemigu acérrimu de tolo que sonara a asturianu, como tola familia (cuñáu incluyíu, illustre miembro de los Amigos de los Bables, grupu que se disolvió va años ente efluvios d'alcohol y defunciones). Detrás d'él vino María Paz Fernández Felgueroso. Tres llexislatures pan nun facer tampoco gran cosa por Xixón, nin tampoco por Gijón; como se vio qu'acabó cediendo'l poder a otra derecha más derecha que'l PSOE y bastante más que'l PP. L'alcaldesa llamóse Carmen Moriyón Entrialgo. Y sigue llamándose, porque vuelve ser alcaldesa después de cuatro años d'infausta memoria nes manes d'Ana González Rodríguez, otra declarada enemiga de Xixón y de tolo que sonara a asturianu.

Y con estos precedentes la xente asústase comentando que l'alcaldesa ésta ye alcaldesa porque pactó con Vox, un grupu que comparte votantes con ella y qu'ente los dos-yos los roben al PP. Al que también subieron al carru. Adiós Xixón. Yá nun ye qu'enxamás-y llegará a la suela a Donostia o A Coruña, nin que pinte nada a la vera de Santander, ye que yá pinten más Ortigueira y Ondarribia. Porque sí. Porque ye normal. Los llugares con nome propiu escuenden una cultura propia. Una identidá. Y Xixón yá nun ye nada. Ye Gijón. Un llugar anónimu. Nel mediu de la nada. Siento una enorme tristeza por un llugar que quixe tanto. Un llugar nel que pasé los meyores años de guaje y al que tengo qu'agradecer que me salvaran la vida los socorristes. Un llugar nel que lo tengo pasao meyor qu'en ningún otru sitiu d'Asturies. Pa qu'agora seya esto. Nun sé si se lo merez. Cuido que sí. Que los votantes lo decidieron. Que la xente se merez los alcaldes que tienen. Los conceyales que tiene, los pactos que tienen. Pero, siéntolo, ésti yá nun ye'l Xixón míu. Va tiempu que nun lo ye. Agora menos que nunca. Qué pena.