My way

Como se recuerda, d'aquella había perres como borra. Les grandes ciudaes y les que los sos alcaldes suañaben en convertir en grandes ciudaes, apostaben pola vanagloria de los grandes conciertos. A Coruña, como Uviéu, como Xixón, como Santander, como Bilbao, apostaben por esi circuitu al que llegaben les lluces y los decibelios de Michael Jackson, Metallica, Eagles, Elton John, Bon Jovi, Juan Luis Guerra o Frank Sinatra. Pero, nesta ocasión, tuvo de ser el cantante de 'Strangers In The Night' el qu'anunciara'l fin de los tiempos. De nada sirviera toa aquella publicidá barata de megaestrella que desixe tener en camerinu una docena de botelles de Jack Daniels, té de Ceilán, xamón de Parma (nun se pue facer ostentación de más grande inorancia) y tola cacía alemana.

Punxéronse a la venta ocho mil entraes. Vendiéronse unes tres mil escases. Les más cares, a quince mil pesetes, agotáronse. Les barates, a seis mil pesetes, malapenes. El conciertu fue magníficu. El fracasu económicu, tamién. Al final, viendo qué nun se vendíen, l'ayuntamientu regalábales. Pero yá la xente nun quixo nin dir. Lo que se da gratis nun tien nengún valor.

Aquello dio una voz d'alerta clara. N'A Coruña dexó d'haber grandes conciertos. El restu los sitios empezaron a pensáselo. Haber húbolos, pero la cosa fue pasu ente pasu diendo a menos. Toos nos alcordamos d'otres cites col pasu los años en llugares como Uviéu y Xixón. N'Uviéu cada vez menos. En Xixón cada vez más distanciaos. Y siempre arriesgando lo menos posible. Anque palos ayuntamientos siempre resultara fácil arriesgar coles perres del ciudadanu. Disparar con pólvora ayeno.

Lo mesmo que facíen los grandes ayuntamientos tamién lo emularon los pequeños. L'exemplu de Mieres ye d'estudiu. Los conciertos yeren de menor categoría, pero importantes. Acabaron regalándose más entraes de les que se vendíen. Al final la xente dexó de dir. Lo mesmo qu'ocurría en toles partes. A lo que nun se-y da valor dende la institución, nun lo salva nin la grandeza de la música nin la figura d'un gran artista.