Vocabulariu

Mañana sábadu ye la XXI edición del Mieres Mozo, el más grande alcuentru de cantadores menores de 18 años d'Asturies. Pa ellos ye esti vocabulariu mínimu de la canción asturiana. Una mínima serie de términos propios pa entender esti xéneru, el más identificativu de la música asturiana:

Acazurramientu: Cuando se fala de la castellanización de les tonaes, los cantadores comenten que se trata polo xeneral d'una cuestión personal de cada intérprete. Un fenómenu al que popularmente se lu conoz como acazurramientu.

Aire: Dizse cantar con aire cuando'l cantador lo fai con enerxía al altu la lleva. Y dizse tener un aire cuando una tonada recuerda a otra.

Arriba: A la característica de cantar blincando a una octava más alta en delles tonaes, llámaselu dir arriba. Cuando dalguién lo fai mui bien dizse qu'ési va mui bien arriba.

Cadencia: Llámase asina a la llinia melódica d'una tonada. Les soberanes carácterícense, por exemplu, por tener una cadencia curtia. Les arrieres, por tener una cedencia complicada.

Cantusa: Ye'l cantar que se siente na distancia.

Empatar: Dizse de dos voces, polo xeneral una d'home y otra de muyer, que van bien en xunto, polo xeneral con una distancia de tercera.

Entendíu: L'aficionáu de tonada qu'amás se siente con capacidá pa enxuiciar les calidaes de les interpretaciones.

Escuela: Orixinariamente dicíase qu'un cantador, por exemplu, yera de la escuela de Juanín si cantaba por Juanín. Agora, tamién por exemplu, yes de la escuela d'Ismael Tomás si vas a clases con él.

Estilu: L'erru más frecuente que se comete nel ámbitu de la tonada ye'l de confundir melodía con estilu; de manera que dos tonaes que tienen en verdá la mesma melodía munchos dicen que tienen el mesmu estilu. Asina, repiten estilu si canten dos cantares cola mesma melodía. En verdá, los estilos son maneres de cantar, como les braves, les arrieres, les pravianes...

Estribillu: Ye'l nome que reciben los versos finales d'una tonada y que polo xeneral nun tienen nada que ver con ella.

Imprentar: Crear una nueva tonada, tanto en lletra como en música, anque polo xeneral namás en lletra. Diamantina dicía de 'Arboleda bien plantada': «Esa impretéla yo, entera».

Posase: Asentar bien les piernes sobre un escenariu p'arrancar a cantar, dizse saber posase.

Viyuela: Nome d'un páxaru imaxinariu que sirve en les Cuenques pa dicir de dalguién que canta como una viyuela pa indicar que lo fai maxistralmente.

Vueltes: Nome que reciben les series melismátiques característiques de la tonada tradicional.

• Temas
• Alitar Asturies