Qu'ascos

Asina tamos. Acaben llevándote a xuiciu los tos propios compañeros de partíu. Tampoco ye dalgo que garre a naide de sorpresa. Va años yá lo denunciara un diputáu del gremiu. Llámase Fidel Sánchez. Bien que lu punxeron a parir. Namás por dicir qu'aquello nun yera un partíu sinon una asociación mercantil de Cascos. Una tapadera pa pagase los caprichinos de paletu asturianu en Madrid. Nun lo oculta delantre'l xuez. Llegara a un alcuerdu con ellos: preséntome si me lo pagáis too. Presentar, presentóse. Agora resulta que lo de págalo too yeral literal. Hasta pa quedase coles perres que teóricamente yeren pa pagar el local del partíu. Si'l partíu yera él, les perres toes pa él. La lóxica ye aplastante. Agora, a reclamar al maestru armeru. Como los viaxes d'él y de los guajes. Como les comíes d'él y de los guajes. Como les entraes pa él y pa los guajes, de lo que-yos apeteciera. Un partidín de tenis de la Copa Davis. Una visitina al Muséu pa entretenese. Una pizza pa quita-yos la fame. Dalgo más consistente nun restorán de Marbella. Dalgo más llixero n'otru d'Estepona. Un poco de sushi pa que me lo traigan a casa los de Globo. Unes pitances de mariscu per Galicia. Una vueltina n'AVE hasta Córdoba. Unos zapatinos Callaghan mui económicos. El psicotécnicu pa la llicencia d'armes. La llicencia de pesca, entera. Un colchonín con canapé pa echar un pigacín cola chuchi. Unes pastillines d'eses de llevantar dalgo más que l'ánimu. Y lo que quedará por ver. Recordái que too esto ye de cuando dexó de ser presidente. Como pa mexar y nun echar gota. De presidente namás que tuvo un cuartu d'hora, pero menudu cuartu d'hora. Fue tan tuntu que convocó elecciones porque diba arrasar. Y arrasáronlu a él. El partíu de chiste que fundara siguió creyendo n'él. Marchó pa Madrid cola chuchi y los guajes, y toos estos benditos pagándo-y mes a mes tolos gastos. Agora protesten. Pero él tienlo claro y asina-y lo diz al xuez: ye lo que hai.

La verdá ye qu'enxamás tuvimos suerte colos presidentes del Principáu. Empezamos mal, con aquel paisanín que vino de fuera y que nun sabía nada d'esto. Asina nos fue. De mal en peor hasta llegar a Tini. Pasando por Cascos, del que yá se pensaba que peor imposible. Pues, yá lo veis. Tovía parez que lo fizo peor cuando dexó de ser presidente. Ehí lu tenemos, nel banquillu de los acusaos. Al delláu d'otres glories nacionales, como Villa o Rato. Como tantos más. A políticos ilustres va ser difícil qu'otra autonomía nos gane. Qu'ascos y que voltures nos tá dando. Ye lo que hai.