La multitú

Dedícome a facer un análisis estadísticu a partir de les mexaes del nuestru perru nes faroles con publicidá electoral. Como sabéis, los perros mexen y marquen. Cuento los dos casos y, arriendes, un terceru: si marca, póngo-y al candidatu una x; si mexa, dos; y, nel casu de que procediera a facer artes mayores nes inmediaciones, apunto tres. Toles variables son bones pa facer análisis estadísticos. Les agües mayores y menores de los perros puen ser analizaes estadísticamente. La fiabilidá de los resultaos dámos-yla nosotros coles nuestres apreciaciones y comentarios. Nel casu de Mieres, nun hai sorpresa: la farola más mexada ye la del actual alcalde. Tampoco da la cosa como pa pensar muncho más allá.

Cuenta coses como esta James Surowiecki nel llibru 'The Wisdom of Crowds' (La sabiduría de la multitú). Parte de l'anécdota de Francis Galton, mui a primeros del sieglu XX, cuando de visita a la feria de ganáu de Plymouth vio que tol mundo facía apuestes de 6 peniques sobre cuánto pesaba a güeyu un güe. El qu'acertara, llevaba de premiu'l güe. Galton anotó les valoraciones de los 800 apostantes, sumóles y dividióles pol númberu d'apostantes. El resultáu d'esta media aritmética daba 1197 libres. Al final el güe dio de pesu na báscula 1198 libres. A esto ye lo que Surowiecki llama la sabiduría de la multitú.

Llevanto de la cama, prendo la tele y too acaba siendo datos estadísticos. Nótase enforma que tamos en periodu d'elecciones. Da igual que la estadística seya sobre díes de lluvia que sobre ocupaciones de pisos que sobre menores non acompañaos que crucen en patera que sobre'l númberu de víctimes nel conflictu d'Ucrania. Sal hasta un entendíu que diz que, polo tardío del añerar de les cigüeñes y la escasa presencia d'exemplares, deduz estadísticamente que la seca va durar hasta la seronda; datu que ratifica cola consulta del calendario zaragozanu y otru par de métodos. Y too ello nel diariu de noticies. Nun sé porque nun añaden una sección d'horóscupu, porque a la hora de fiabilidá tiene los datos d'andar pareyos. O la estadística mía de les mierdes y mexos de perru. Pa que los datos tengan un poco más d'aquel voi comprobalos con más perros, pa ver lo qu'hai de cierto na sabiduría de la multitú.