LSD

De tolos narcotraficantes piquiñinos que dio esta tierra, tovía guardo bon recuerdu de Toño'l de Cimavilla. Nel branu del 72 yá traficaba con pastilles de LSD por Xixón. Que d'aquella nun se llamaba tovía nenguna otra cosa rara, sinon simplemente LSD, que pensábamos yeren les sigles de Loado Sea Dios. El so suministrador yera andaluz y conociéralu cuando los conciertos en Xixón de grupos como Smash y Storm. La mercancía venía directo de la base de Rota. Siempre creyí que l'eslogan «OTAN non, bases fuera» convirtiérase na primera consigna antidroga d'España. El mercáu nestos conciertos yera restrinxíu porque a ellos díbamos mui poca xente. Too empezó a medrar a partir d'un conciertu de Joan Manuel Serrat, cuando cantaba 'Mediterráneo'. El saltu fue cuantitativu porque'l mercáu amplióse a tola pijería de Somió, L'Arena y San Miguel, y a la progresía d'otros como La Calzada, El Coto o el Nuevu Xixón. Toño empezó a nun dar abastu y tuvo qu'averar él pela primer vez a San Fernando de Cádiz. Fue a primeros de septiembre d'esi mesmu añu. En tres meses el mercáu disparárase.

A Toño empezó a presta-y demasiado Cádiz. Punxo al frente de la distribución a un responsable por barriu y él dedicóse a disfrutar del mar y de los réditos dende una casina en primera llinia de playa en Zahara de los Atunes. El responsable de L'Arena fue Jesús, qu'años más tarde preparó les oposiciones pa Policía Nacional y acabó trabayando d'ello. Pa entós yá Toño trespasara'l negociu y marchara p'Arxentina detrás d'una moza. Yera'l 76, acababa de morrer Franco y aquella moza acabó por convertilu nun isquierdista radical. Pero esa yá ye otra historia. Un policía conocíu de la zona de Barbate comentára-y que sabíen tolo del so negociu, pero que nun interveníen por un tema d'estratexa: la mocedá que se dedicaba al LSD y al rock and roll nun se metía en política. Y yeren años mui revueltos.

Jesús dexólo cuando acabó'l COU y se dedicó a les oposiciones pa Policía Nacional. Pocos años después, de la que yá trabayaba nello, contóme que-y sirviera enforma la esperiencia como trapicheru. Agora trabayaba nuna unidá antidrogues. Yá yeren los años de la heroína. Comenté-y qu'en Mieres la situación taba desbordada. Toles selmanes aparecía dalgún muertu en barrios como Santa Marina, Returbiu o Turón. Comentóme que la estratexa fuera la mesma: los qu'agora se dedicaben a la heroína tampoco diben dar la vara metiéndose en política. Había güelgues per toles partes. Sacando a los mozos de les barricaes taben acabando col futuru. Consiguiéronlo. Nun hai más que ver como quedó Mieres. Y onde pon Mieres podéis poner lo que queráis: Llangréu, Avilés, Xixón mesmo.

• Temas
• Alitar Asturies