Borrar
Encuentro del presidente del Principado de Asturias con la Redacción de EL COMERCIO

Kamikaze

Ismael González Arias

Viernes, 22 de noviembre 2024, 01:00

Volviendo del sur por la A6, pasaos Orbita, Espinosa de los Caballeros y Arévalo, nel entronque qu'indica la salida pa Palacios de Goda, vimos baxar un coche en dirección nuestra. Cinco segundos enantes podría llevanos per delantre de nun lu esquivar, como vi pol retrovisor que facíen los coches que veníen detrás. En menos de mediu minutu, Bea marcó'l 112 y dimos cuenta del sucesu. Nun supimos más de la hestoria. Pero, yá esa mesma nueche, costóme conciliar el sueñu y, cada vuelta que lo consiguía, esconsonaba como d'una velea. Viaxamos tolos meses de parte a parte de la península y ye raro tener el más mínimu incidente. De toles formes, ésti en concreto, animónos a garrar l'avión y escaecenos por unos díes del coche. Asina, esta nueche pasada, llegaos yá al destín, dormí nueve hores siguíes. Escribo ésti artículu cola serenidá que dexa'l dormir. Recordando que, va pocos díes, lleía la noticia del choque frontal d'un kamikaze na A6, con resultáu de cuatro muertos. Un motorista que pasaba y que s'estrelló por mor del accidente, pue contalo porque tuvo la bendita suerte de nun reventar el so cuerpu escontra les pates de los quitamieos.

Bea, que tuvo más tiempu que yo de mirar al conductor del coche que s'incoporaba pol carril nuestru, dizme que se trataba d'un señor mayor al volante d'un coche vieyu. Lo que quier dicir, de xuru, que tábamos delantre de dalguién que, pola razón que fuera, sufría un despiste. El problema ye'l mesmu. El kamikaze despistáu y el kamikaze voluntariu. Nel casu d'incoporase al nuestru carril la posibilidá d'accidente ye clara nos dos casos.

¡Hai que quita-yos el carné! Ye'l comentariu xeneral. Más que nada pal casu del kamikaze despistáu. ¡Había que corta-yos los güevos! Pa los demás. Yo que, pola edá, yá voi camín de kamikaze despistáu, cuando empiecen a dicir lo de quitar el carné, recuérdo-yos que tíu Antonio, el día que cumplió cien años, pa celebralo, renovó'l carné de conducir, llegó a la fiesta de cumpleaños al volante d'un 550 Spyder y presentó a la novia, una señora bastante más moza qu'él, de 72 años. Y, en cuanto a edá, tamién-yos recuerdo, que mio padre, con unos pocos años menos que yo, intentando entrar nel aparcamientu de debaxu casa, entró na discoteca R2 pola puerta d'emerxencia y llegó col coche hasta la barra. Cola serenidá que lu caracterizaba, díxo-y al camareru: «Espera un momentín, que baxa'l mio nenu a sacavos el coche». Eso ye. Ún pue ser despistáu, pero lo que nun tien ye que perder enxamás la serenidá.

Esta funcionalidad es exclusiva para suscriptores.

Reporta un error en esta noticia

* Campos obligatorios

elcomercio Kamikaze