Espluma

Atrás quedara yá la playa de Pría, y les piernes d'Aida temblaben más a cada pasu. Llevaba dos hores andando al borde del acantiláu, col fíu a la espalda. Apartaba les fueyes intentando que la piel del bebé nun se firiera, y diba agarrándose a les piedres.

Cuando llegó vio que la marea taba baxa. Fizo na arena un pocín y metió al bebé pa que xugase col agua. Ella sacó un cuadernu marrón, nel que llevaba escribiendo más de diez años. Rellatos de selmanes buscando cuentos, cantares y lleendes. Pallabres que falaran de personaxes misteriosos, y visites a los sitios onde teníen llugar eses histories de seres máxicos. Caún taba nun capítulu, y cuando lu tenía caracterizáu intentaba facer un dibuxu. Guiábase polos llibros y lo que-y contaba la xente, pero tamién polo qu'ella mesma vía. Delles figures acababen siendo bien diferentes a como la xente imaxinaba, acompañaes dalgunes de secretos enxamás revelaos.

Esta vegada yera distintu. L'esplumeru apaecía en pocos llibros, y nun había dos que dixesen lo mesmu. Cuando diba a los pueblos del monte la xente dicía-y que fuera a ver a los que vivién na costa, y los de la costa cerraben la puerta pocu dempués de sentir esi nome. Los más atrevíos dicíen-y que nun yera más qu'una figura qu'apaecía nos llibros p'asustar a los curiosos.

A pesar de les alvertencies, siguía col deséu de tener una respuesta. Yera'l momentu d'esbozar. Les sos manes, al tiempu, dibuxaben llínies, y en poques hores l'esplumeru d'Aida paecía salise del papel. Un querubín que nacía de la espluma, con un caracol no cimero de la cabeza y güeyos tan oscuros que paecíen cuenques vacíes.

La brisa movía les fueyes del cuadernu, y pocu a pocu diba llevantándose un aire que cortaba la calor del sol. Foi buscar al pequeñu al pozu enantes de que les foles fueren grandes. El vientu facíase fuerte, delles gotes tropetáben-y na cara y llegaben con tanta fuercia que mancaben. Una niebla cegó a Aida a pocos metros del pozu, zarró los güeyos y llanzóse p'agarrar al bebé. La mar cubriólos a los dos, pero ella nun dexó d'abrazar al pequeñu. El so cuadernu tragáralu una de les foles, pero la última fueya taba na orilla.

La mar dexó d'emburriar. Aida taba dientro, col agua hasta'l pescuezu. Vio al so fíu no cimero d'una roca, soltando un allaríu qu'asordecía, y que recordaba a los glayíos que se describíen nos llibros.

Dende la piedra soltó un suspiru que movió l'agua, la madre cayó, y los dos desficiéronse n'espluma.

• Temas
• Alitar Asturies