Dicir revolución

La palabra 'revolución', pa nós los franceses, nun ye una palabra imprecisa. Sabemos que la revolución ye una rotura, que la revolución ye un absolutu. Nun esiste la revolución moderada, nun esiste la revolución planificada -como se fala d'economía planificada-. La revolución de la que damos anuncia va sovertir dafechu'l sistema actual, o nun va ser.« Un home, al que vemos n'escorzo, recita les palabres que Georges Bernanos escribiere va cuasi ochenta años mentanto camina pela oriella d'un llagu suizu: «Si pensáremos qu'esti sistema ye quien a reformase, de romper por él mesmu col camín gafu d'evolución hacia la dictadura -la dictadura de les perres, de la raza, de la clas o de la nación- de xuru que nos negaríemos a correr el riesgu d'una esplosión capaz de destruyir les coses precioses que namás se reconstrúin con munchu tiempu y enfotu, con desinterés y amor. Pero'l sistema nun va cambiar el sentíu de la so evolución, porque yá nun evoluciona; organízase namás pa siguir, pa sobrevivir». El testu pertenez al llibru 'Francia contra los robots', nel que Bernanos siguía alertando contra los peligros del totalitarismu («neñu terrible y mui tempranu de la Civilización de les Máquines»). La imaxe del home que lu rememora y encarna ye de l'adaptación cinematográfica que Jean-Marie Straub rodó y estrenó col mesmu títulu en 2020. Una película de menos de diez minutos que repite dos tomes diferentes d'esi mesmu planu en dos momentos diferentes del día. ¿Cambia'l significáu de les palabres al cambiar l'entornu nel que se dicen? ¿Qué intención tien Straub al reunvíanos dende'l sieglu pasáu al nuestru presente estes palabres? ¿Tovía puen resonar nel nuestru porvenir?