Detalles periféricos

A munchos de los espectadores d'aquella película, más allá del rexistru de la peripecia del bebé y los sos padres alredor de la comida, lo que-yos llamó l'atención foi'l movimientu de les cañes d'unos árboles, ximielgaes pol aire, na esquina superior drecha del encuadre. Lo que más espertaba la fascianción d'esos primeros espectadores d'imáxenes en movimientu proyectaes nuna pantalla yeren los detalles periféricos non planificaos polos responsables de la toma. La realidá que, ensin permisu, cuélase nel encuadre fuera del control y del dictáu de naide, y que la cámara rexistra cola frialdá d'aquella máquina máxica recién inventada. Como señala'l cineasta Jordan Schonig, autor del videu-ensayu 'The Wind in the Trees from Early Cinema to Pixar' (2020), eses reacciones de los espectadores «dan a entender l'atracción como un efectu de la capacidá novedosa del cine pa enseñar que l'autonomía del mundu desarróllase siempres fuera del control del autor».

Años depués d'aquella sesión del cinematógrafu en París, David W. Griffith -que malapenes reflexonó en voz alta sobre'l so arte-, señaló una verdá exacta que conecta aquella fascinación colos primeros pasos del cineasta na película nueva que ta empezando a pensar: «Lo que'l cine modernu necesita ye la guapura, la guapura del aire que se mueve nos árboles».