Cuenques

Les cuenques en xeneral ye un guapu llaboratoriu d'estudiu nel que ver como, con relaciones cruzaes con esta casta de prexubilaos y les sos ramificaciones sindicales, surdieron toa una riestra impresionante de tipos humanos: funcionarios a los que comprar por una paletilla de xamón; políticos que se vendieron por bien poco; tertulianos que discutieron y discuten ainda sobre la cuenca A y la cuenca B y nun se saben viviendo na cuenca Z (de zombies); corredores de rallyes a nenguna parte que compiten por nada nes rectes de Turón, que namás son rectes pa los de Turón; profetes d'un futuru imposible sobre'l que son quién a falar durante años pa nun llegar a conclusión nenguna; gaiteros de risa y cupletistes de tonada; toreros ensin toros y domadores de circu ensin lleones; xefes de gabinete de chiste y asesores de tolo asesorable; reinones de varietés que dan llecciones de moral agora que dexaron de dales los cures; cansinos y cansaos, que cada día medren y medren y nun van dexar de medrar; presidentes d'asociaciones varies y desvariaes; organizadores d'organizaciones obreres ensin obreros; defensores de los gatos y pañadores de mierdes de perru; protestonos de nada, comentaristes de too, apoloxistes del súdamelo too, quexones de lo barato, demanderos de lo imposible, renegaos de la vida en xeneral... y enfin, amigos nuestros, más qu'amigos, amigonos y amiguinos, conocíos, xente cola que te reír, xente que te fai reír y xente de la que reír. En xunto, xente qu'hai per toles partes pero que nes cuenques acabó convirtiéndose nun mundu guapu del que falar. Y escribir. El llibru, prodría titulase 'The early-retirement Caste within the Asturian Coal Mines', pero titulélu 'La reserva protexida de les cuenques'. Por si t'apetez.