L' atención desviada

El 21 de febreru de 1929, Dziga Vertov dictó una conferencia titulada 'Los métodos del rodaxe documental' na qu'esplicaba la so posición contra'l cine con actores. El cineasta aprovecha les tardes del mes d'agostu -esi tiempu nel que la realidá vive ente ... paréntesis- recuperando una colección d'escritos del cineasta soviéticu. Apunta nel cuadernu dalgunes idees d'aquella intervención. Interésa-y muncho cuando fala de «l'atención desviada». Vertov defiende que les persones que tean delantre de la cámara nun tienen que notar la so presencia o, polo menos, nun tienen de facer mui presente l'acción de grabar: «Si l'home dirixe una atención marcada a la cámara, ye conveniente contar con un segundu aparatu». «El meyor rodaxe ye rodar d'improviso, a escondíes», recomienda. Y pon un exemplu dictáu pola esperiencia. Un día, mientres visitaba un rodaxe, nel momentu que'l realizador mandó cortar porque la secuencia yá taba terminada, él empezó a filmar cola so cámara «invisible». «L'actriz tuviere interpretando y tan ocupada na so interpretación, n'ayén, que nel momentu nel que yo la filmé tovía nun se recuperare y nun nos prestaba atención nenguna». La secuencia de Vertov yera muncho meyor que tolo que l'otru realizador rodare enantes cola actriz. L'equipu de la película pidió-y los sos planos pa utilizar nel montaxe final. A Vertov nun-y gustaba'l cine con actores -«Teatru restauráu», lu llamaba-, pero sabía que yera difícil lluchar contra él -«Representa'l 98% de la producción mundial. Nun sé quién ta contra quién», dicía-. Él defendía que'l papel esencial del cine yera otru bien diferente: «Afitar los documentos y los fechos, afitar la vida y los procesos históricos». El cineasta, camín de setiembre yá, sorraya esta última frase nel cuadernu de trabayu.