La fuerciadel pasáu y del futuru

Too y dafechu. «Revitalizar, esi ye'l verbu, non recuperar». dicía Sánchez Vicente en xunetu de 1974, na entrevista con García Arias y Álvarez que sigue considerándose la fundacional, magar que los sos raigaños tuvieren yá formándose na I Asamblea Rexonal de 1973. Nun cabía yá señardá si se falaba d'una llingua viva que, gracias a CB, bien llueu diba saltar a la prensa, con estaya propia n''Asturias Semanal', a los cursos de formación (al primeru, cellebráu en xineru de 1975, apuntáronse 118 persones) y, sobremanera, a la reivindicación política. De la pancarta de 'Bable a la escuela y estatuto de autonomía', na manifestación histórica de 1976, saltaríase ceo a la llucha pola confección d'una gramática –lo mesmu que nun se negara, tres sieglos atrás, al castellán–, al entamu de la protesta musical del Nuevu Canciu Astur y al Surdimientu. A facer realidá los suaños. A intentalo, polo menos.

Y too llegó. Nun tiempu récord, prendiendo la llama. L'Estatutu, l'asturianu nes escueles –yá van cuarenta años d'ello– y l'Academia, el fitu fundamental d'aquel xeitu por falar del idioma en presente y non en pasáu; superponiendo'l futuru a l'alcordanza. Inclusive nos años 90, cuando de Conceyu Bable quedaba yá poco, de la llucha pola cultura n'asturianu d''El Llapiceru' conocimos les asturianes a Igor Medio. Tiempu atrás, en 1978, surdió también esta mesma seición, 'Alitar Asturies', apueste firme de Francisco Carantoña pa con una entidá de la que, tovía güei, cuesta falar en pasáu. Gracies a Conceyu Bable, aquella lluz melanconiosa risca anguaño, día tres día, les nueses alboráes. Tien, poro, tola fuercia del presente. Y la del futuru.