Falamos con Neto

Nerea Vázquez, actriz, cantante, contadora d'hestories, una auténtica show woman nes tables o na televisión. Tien un Premiu Oh! de les Artes Escéniques y el del públicu que se identifica y la reconoz cuando sal a escena. Ye verdá lo que diz nesa gran verdá de les mentires que ye'l teatru. Lo suyo ye puru remangu o como dicen pel Sur: munchu arte

Xaime Martínez, poeta, narrador, músicu, filólogu, grau en llingua española y les sos lliteratures pola Universidá d'Uviéu, representa bien la orixinalidá y el rigor de les nueves xeneraciones de creadores na nuestra llingua. Novedad, frescura, talentu y dalgo de provocación, son les ferremientes conles que da aliendu al asturianu nos sos trabayos

Pablo Casanueva, cineasta, fotógrafu, observador y recopilador de la memoria como forma viva de la realidá. Un contador d'hestories al traviés de les imáxenes y de la llingua que les xeneró

Rubén Bada, músicu col don de la ubicuidá y esi otru don más prestosu de l'apertura d'oreyes y de mente. Entiende la tradición como una música que nun separta, xune distintes creaciones culturales y populares de la xente de tol mundu al traviés de la espresión de les emociones y de les idees que lu siguen moviendo

Marta Mori, académica de la Llingua, profesora universitaria, poeta y una de les voces  crítiques más perspicaces y enfotaes de la nuestra lliteratura, dirixe precisamente la revista que lleva esi nome: Lliteratura, una publicación onde da a conocer a los nuevos valores y publica tamién a los clásicos contemporáneos

Leticia Baselgas, llicenciada en Belles Artes, doctora en Historia del Arte, illustradora, pintora, música y panderetera, sacó soníos nuevos y actitúes nueves, y sobre too una manera d'afrontar la creación dende la tradición deconstruida y revolucionada, única y singular como tolo que sal de les manes d'esta artista popular