L'airón

Oh, l'airón, l'airón xibla al traviés de les tumbes xibla l'airón, la llibertá va llegar ceo», canta Leonard Cohen en 'The partisan'. En 'Profit Motive and the Whispering Wind' (2007), John Gianvito rexistra cola so cámara eses mesmes tumbes, proponiendo un percorríu pelos espacios nos que descansen los resistentes norteamericanos, no que dalguién definió «como una historia llapidaria de la llucha de clases». Un exerciciu de memoria política radical que naz de la conciencia de nun poder escosar el tema que quier tratar: «Ye una historia complexa a la que namás se pue acceder al traviés de los llibros», diz Gianvito. Un cine calóricu qu'asume la so naturaleza explícitamente política énte esi otru cine mayoritariu de «cero caloríes» que, consciente o inconsciente, omite'l contestu políticu de les histories que cuenta. «El cine que faigo -y el que me presta ver- ye'l que nos saca de les nuestres rutines complacientes y ponnos delantre de la nuestra responsabilidá pa col mundu, ufiertándonos los preseos intelectuales y prácticos necesarios pa siguir na llucha», diz Gianvito, qu'alcuentra la utilidá d'esi cine nuna idea de la teórica de la imaxe Nicole Brenez: «El fechu de qu'ún pueda pensar con dalgunes películes, y non namás nelles, ye'l signu irrefutable del so valir». 'Profit Motive and the Whispering Wind' adapta de manera exemplar l'ensayu 'La otra historia de los Estados Unidos', de Howard Zinn, asumiendo al tiempu'l programa del historiador: «Les coses que faigamos -enseñar, escribir, face películes...-, nun solo tienen de facer que la xente se sienta bien, inspirada y n'harmonía colos otros, tamién tienen qu'educar a una xeneración nueva pa facer esta cosa tan modesta: camudar el mundu».