Populismu y corrupción

Toi pensando nos nuestros Villa, Vitorino o Gabino y en cómo algamaron tantu poder. Pero tamién n'Elon Musk, Jeff Bezos o Donald Trump, y la que nos va venir con ellos na Casablanca. Adiós casta anquilosada na antigua democracia europea. Hola nueva plutocracia emerxente que va acabar con tanta tontería. Y ya sé qu'a naide-y presta tener en sillón a políticos corruptos, condenaos y mentirosos. ¿Pero hasta ónde tamos dimpuestos pa evitalo? ¿Vamos ponenos repunantes a la de denunciar? ¿O vamos siguir, como siempre, votando a caballu ganador? Tengo pa min que tolo más, como prometía nos años cincuenta del sieglu pasáu, un candidatu colombianu a la presidencia del so país: «...reduciremos la corrupción a sus justas proporciones».

Ye l'empiezu d'una dómina con namás que dos bandos: autoritarios contra demócrates. Y van ganando los primeros. Hai ya trenta años Francis Fukuyama escribió que la historia acabara. Referíase a que, col esbarrumbe la muria Berlín, el capitalismu ganara la guerra ideolóxica y económica y ya nun diba haber más alderique políticu. Qué enquivocáu taba.

Cásique tol sieglu venti vivió la batalla ente democracia, fascismu y comunismu. Nos años cuarenta cayó'l nazismu de Centrueuropa. Nos setenta acabaron les dictadures del sur; d'Europa y d'América. Nos ochenta les del Este y nos noventa hasta l'Apartheid africanu. Tol mundu coincidía: la democracia y la globalización yeren el futuru y traíen prosperidá. Pero llegó la crisis del 2008 y depués la pandemia, y los políticos y les instituciones empezaron a «nun nos representar».

Y llegó Trump. Y ganó. Y empezó a desmontar la bolera. Y en dalgunes coses hasta tien razón. Quiero dicir qu'insultando al emperador desnudu ta conectando col estáu d'ánimu de bien de xente pa conta-yos lo que más quieren sentir: que los ricos saben bien lo que toca facer y qu'en faciéndolo, a ellos, va di-yos meyor. Y, enfrente, da pena ver a la nuestra clas política, eso, enfrentada.

¡Ai, San Winston Churchill, cómo necesitamos nuevos portavoces!