Manual d'instrucciones

Somos europeos y de cumplir promeses y pagar factures. Que lo otro ye trampa y sabemos bien cómo rescampla: ficímoslo cola nuestra defensa; trampa digo, cuando nos años diez, trenta y noventa del sieglu pasáu dexemos qu'otros d'encargaren de les nuestres armes p'agora decatámonos que nada nun salió gratis. Y anguañu toca pagar.

Somos europeos y nun tenemos otro que nos enfotar. Nes nuestres posibilidaes, digo. Porque importar l'aceru y el carbón d'afuera —que ye más baratu— o el gas, o los arbeyos o yo qué sé de nun sé ónde ye un cuentu que sabemos bien cómo acaba: «Ello yera que tiníemos una carpintería, y trabayábemos enforma, y vendíemos lo nuestro a los vecinos y comprábemos-yos lo d'ellos. Hasta qu'un día merquemos cásique toles ferramientes d'afuera; yeren peores y nun me duraben gota, pero, qué contra: salíen tan barates… Col tiempu, otros ficieron lo mesmo y el ferreteru terminó cerrando, pero nun nos importó. Detrás pasó-y lo mesmo al zapateru: porque tol mundu, en cuenta compra-ylo y reparalo prefería más traelo d'importación. Naide dixo nada tampoco. Al poco, de la que cerró la teyera, porque con plásticu y uralita barato techábase igual, dalgunos empezaron esmolecese más. Y yo un pocoñín, que cada vuelta quedaba menos xente que m'encargare coses; pero, buenu, aguanté. Hasta que cuando'l maderista amenazó marchar empecé protestar; pero resultó como dar voces en castañéu: nun quedaben munchos que me quixeren sentir. Y agora nun tenemos carpintería».

Somos europeos y nun nos vamos dar. Tolo contrario: vamos predicar col exemplu y dexar de castiganos a nosotros mesmos colo qu'otros nun son a facer. Porque pa eso tenemos aranceles y normes y modelos qu'aplicar y una moneda y propia, y ya valió de siguir dependiendo namás que de lo d'afuera. Somos europeos y namás que nos falta creénoslo de verdá y contar que, ente ún y otru tiranu, nun tenemos otro que sobrevivir, uníos na pluralidá, con voluntá y soberanía.